VOV4.Êđê- Êlâo kơ hrue Noel thŭn 2021, kkuh drông thŭn mrâo 2022, aguah mbrue (23/12), Khua lăn čar Nguyễn Xuân Phúc nao čuă, mđup brei mnơ̆ng, lehanăn hơêč hmưi kơ knăm Khua Yang trŭn hriê ti lăn ala kơ Anôk bruă kiă kriê Sang Aê Diê Khop Hà Nội, lehanăn Dhar bruă bi mguôp jih jang Sang Aê Diê Khop Việt Nam. Nao čuă kơ knơ̆ng kiă kriê Sang Aê Diê Khop Hà Nội, Khua lăn čar Nguyễn Xuân Phúc hơêč hmưi leh kơ Khua knơ̆ng kiă kriê Giuse Vũ Văn Thiên, Knơ̆ng khua kiă kriê jih jang sang Aê Diê Khop Hà Nội, K’iăng khua čih hră Êpul gơ̆ng phung khua kiă kriê Sang Aê Diê Khop Việt Nam; jih jang phung Per, Sơr, lehanăn phung khua kiă kriê dŭm krĭng đăo, anôk mjuăt bi hriăm phung mă bruă kơ sang Aê Diê ti Hà Nội drông sa yan Noel êđăp ênang, mơak mñai, bŏ hŏng klei khăp mơ̆ng Khua yang. Bi klă, Đảng, knŭk kna mâo nanao klei ƀuăn rơ̆ng brei êngiê kơ klei đăo hŏng jih jang phung đăo tui si Hdră bhiăn phŭn, lehanăn klei bhiăn knŭk kna, Khua lăn čar hơ̆k mơak ƀuh, găn leh hlăm hƀuê ênuk, phung đăo Khop hrăm mbĭt nanao hŏng bruă rŭ mdơ̆ng lehanăn răng mgang lăn čar, hdĭp jăk đăo djŏ. Jih jang alŭ wăl đăo, krĭng đăo, anôk mjuăt bi hriăm klei đăo mkŏ mjing leh lu bruă đru dŏng, mâo klei thâo khăp, boh nik mđrăm mbĭt hŏng jih jang êpul êya djŏ tuôm gang mkhư̆ klei ruă tưp Covid 19, ba wĭt leh klei h'uh mđao, mâo sa klei bi hmô jăk hlăm ală phung ƀuôn sang./.

Pô mblang: Y-Khem Niê