VOV4.Êđê- Aguah mbrue (7/12), ti anôk bruă khua lăn čar, Khua lăn čar Nguyễn Xuân Phúc, khua knơ̆ng kiă kriê bruă lĭng kahan lehanăn răng mgang klei êđăp ênang kiă kriê leh klei bi kƀĭn tal sa Êpul gơ̆ng Bruă lĭng kahan, lehanăn răng mgang klei êđăp ênang wưng thŭn 2021 – 2026. Ti anôk bi kƀĭn, Êpul gơ̆ng mâo leh klei trông čhai, mă klei blŭ kơ bruă hgŭm mbĭt plah wah lĭng kahan, kahan ksiêm lehanăn dŭm phŭn dhar bruă alŭ wăl kơ bruă mdrơ̆ng hŏng klei ruă tưp Covid 19, tio nao lu hĭn lĭng kahan bi hgŭm hŏng Êpul răng mgang klei êđăp ênang mơ̆ng Êpul hgŭm lu ala čar, kơ bruă răng mgang klei êđăp ênang internet lehanăn klei bi blah hlăm bruă anei êjai dôk găn ênuk ară anei. Kơ bruă knuă hlăm thŭn 2022, Khua lăn čar, Khua Êpul Gơ̆ng mñă kơ bruă păn kjăp jih jang boh klei, čŏng mkŏ mjing hdră êlan djŏ guôp, bi hmao hŏng klei dôk bi mlih hlăm tar rŏng lăn, lehanăn ti alŭ wăl, Khua lăn čar mtă kơ phung khua kiă kriê, dŭm êpul bruă hlăm Êpul Gơ̆ng mđĭ hĭn bruă lĭng kahan, bruă kahan ksiêm bi răng mgang kjăp klei êđăp ênang lăn čar. Boh nik, čŏng gang mkhư̆, lehanăn bi kdơ̆ng kjăp hŏng djăp mta klei amâo mâo jăk kơ lăn čar. Mbĭt anăn mâo klei bi mguôp kjăp bruă lĭng kahan lehanăn kahan ksiêm hŏng ala tač êngao, mâo klei bi blŭ hrăm bruă lĭng kahan, bruă kahan ksiêm kñăm răng mgang kjăp klei êđăp ênang lăn čar bi pral hĭn, lehanăn răng mgang mơ̆ng kbưi./.

Pô mblang: Y-Khem Niê