VOV4.Êđê- Tlam hruê 7/12, Khua lăn čar Nguyễn Xuân Phúc nao lehanăn blŭ hrăm gĭt gai Klei bi kƀĭn ksiêm wĭt Hdră đru rŭ mdơ̆ng sang dôk kơ mnuih mâo bruă tŭ dưn, phung kahan êka êkeh ƀun, gŏ êsei ƀun ti alŭ wăl čar Hà Giang wưng thŭn 2019 – 2021. Hluê si klei hưn mdah mơ̆ng čar Hà Giang, thŭn 2021, mâo tŭ mă êbeh 63,5 êklai prăk mơ̆ng dŭm êpul êya, mnuih đru kơ hdră bruă, pŏk ngă lehanăn bi leh bruă rŭ mdơ̆ng sang dôk kơ giăm 1.400 gŏ êsei. Tĭng, ênoh prăk jih jang mâo dŭm êpul êya, mnuih đru kơ hdră anei truh êbeh 305,5 êklai prăk. Leh hmư̆ klei blŭ mơ̆ng dŭm Phŭn, dhar bruă, čar Hà Giang, Khua lăn čar Nguyễn Xuân Phúc bi mni kơ čar, khădah jing čar ƀun, dôk tuôm hŏng klei dlan dlan kyua klei ruă Covid 19 lehanăn klei truh mơ̆ng yan adiê ngă, ƀiădah ăt gĭr đru rŭ mdơ̆ng êbeh 5.100 boh sang. Hŏng êbeh 5 êbâo boh sang amâo kjăp, tĭ ƀrôč, Khua lăn čar mtă brei lŏ pŏk hluê ngă hdră anei hlăm wưng ti anăp čiăng kơ mnuih ƀuôn sang dul ƀiă klei dleh dlan./.

Pô mblang: H’Nêč Êñuôl