VOV4.Êđê - Hruê 28/12, ti Đà Nẵng, Khua lăn čar Nguyễn Xuân Phúc nao ti Klei bi kƀĭn trông “Ƀuôn prŏng Đà Nẵng – Boh tŭ lehanăn klei čang hmăng”. Hluê si klei hưn mơ̆ng ƀuôn prŏng, mơ̆ng leh jing ƀuôn prŏng hlăm gưl dlông thŭn 1977 truh kơ ară anei, Đà Nẵng jing leh ƀuôn prŏng ba akŏ hlăm hdră duh mkra krĭng kwar Krah. Dŭm boh tŭ leh 25 thŭn êgao jing klei bi mlih prŏng, hdră duh mkra đĭ kyar nanao. Hlăk ka tuôm hŏng klei dleh dlan kyua klei ruă tưp, thŭn 2019, bruă duh mkra Đà Nẵng mâo giăm 69.500 êklai prăk, hnư hrui wĭt kah knar grăp čô mnuih mâo êbeh 97 êklăk prăk hlăm sa thŭn. Khădah tuôm hŏng lu klei dleh dlan kyua klei ruă Covid 19, thŭn anei, hdră duh mkra mơ̆ng čar mâo giăm 64 êbâo êklai prăk. Ƀuôn prŏng ăt mâo hdră mkra mlih kjăp čiăng đĭ kyar. Blŭ hrăm ti knăm anei, Khua lăn čar mtă kơ Đà Nẵng amâo dưi ư ai hŏng klei leh mâo ƀiădah brei mđing kơ hdră mđĭ hĭn klei thâo kơ anak mnuih čiăng mkăp kơ hdră mđĭ kyar. Đà Nẵng brei jing wăl anôk phŭn hlăm bruă mnia mblei tar rŏng lăn, jing anôk hriê čhưn tluh tluñ êdi mơ̆ng phung duh bi liê, phung tuê hiu čhưn, jing sa boh kdrŭt, ƀuôn prŏng ba akŏ amâo djŏ knŏng đru mđĭ kyar bruă duh mkra mơ̆ng lăn čar ƀiădah lŏ jing sa klei bi êdah lehanăn jing klei ktưn hưn kơ klei gĭr ktưn kpưn đĭ hgao klei dleh dlan, gun kpăk, ba wĭt klei tŭ dưn mơ̆ng ala čar Việt Nam./.

H’Nêč pô mblang