VOV4.Êđê - Ăt hlăm tlam hruê 21/12, hlăm hdră nao čhưn gưl knŭk kna truh kơ ala mtao Campuchia, Khua lăn čar Nguyễn Xuân Phúc mâo leh klei bi tuôm hŏng Khua anôk bruă kƀĭn ala Campuchia Heng Samrin.

 Ti anôk bi tuôm, dua khua kiă kriê mñă klă, Việt Nam lehanăn Campuchia jing dua ala čar riêng gah jĕ giăm, mâo knhuah gru bi hgŭm mguôp, sa ai lehanăn bi đru kơ hdơ̆ng găp, jing klei ktưn hưn lehanăn jing ngăn drăp yuôm bhăn mơ̆ng dua ala čar čiăng kơ dŭm ênuk gưl êdei mơ̆ng dua ala čar krơ̆ng kjăp lehanăn mđĭ lar. Dua tĭng bi tŭ ư hlăm wưng ti anăp srăng mkŏ mjing nanao gưl bi tuôm, bi trông čhai gưl dlông lehanăn dŭm gưl mkăn, bi trông klei thâo ăt msĕ mơh mkŏ mjing klei bi mjĕ mjuk plah wah phung khua, êpul phung khua êmua, êpul phung mniê bi ala anôk bruă kƀĭn ala, Êpul bi ala anôk bruă kƀĭn ala mda asei dua ala čar; lŏ dơ̆ng mđĭ lar bruă klam mơ̆ng anôk bruă kƀĭn ala dua ala čar hlăm bruă mtrŭt mđĭ klei bi mjĕ dua nah; lŏ dơ̆ng bi hgŭm kjăp, bi đru kơ hdơ̆ng găp ti dŭm anôk bi kƀĭn trông ti krĭng wăl lehanăn tar rŏng lăn msĕ si AIPA, Êpul hgŭm bruă kƀĭn ala tar rŏng lăn, Klei bi kƀĭn trông bruă kƀĭn ala krĭng Asi – Pacifik./.

H’Nêč pô mblang