VOV4.Êđê- Hlăm klei nao čuă ala čar Russia, tlam mbruê 1/2, Khua lăn čar Nguyễn Xuân Phúc mâo leh klei bi tuôm hŏng Khua knŭk kna Russia Mikhail Mishustin ti Moscow. Khua lăn čar Nguyễn Xuân Phúc mñă klă, Đảng leh anăn knŭk kna Việt Nam mâo nanao klei hdơr dŭm klei đru mguôp prŏng prĭn mơ̆ng Russia kơ ala čar Việt Nam hlăm klei krŭ kdơ̆ng sua wĭt klei êngiê djuê ana êlâo dih leh anăn wăt kơ bruă rŭ mdơ̆ng, đĭ kyar ala čar ară anei.

Khua lăn čar Nguyễn Xuân Phúc leh anăn Khua knŭk kna Russia kñăm bi trông leh kơ klei bi mguôp Việt Nam – Russia hlăm djăp mta bruă, boh nik jing bruă duh mkra. Bi êdah klei hơ̆k mơak bi mguôp bruă mnia mblei leh anăn duh bi liê plah wah 2 ala čar, bi tŭ ư lu hdră êlan čiăng mđĭ hĭn klei bi mguôp hlăm bruă mtô mjuat bi hriăm, klei kreh knhâo mrâo mrang, dhar kreh, hiu čhưn ênguê, klei bi mguôp mnuih ƀuôn sang 2 ala čar. 2 tĭng ăt bi tŭ ư mđĭ hĭn klei bi mguôp hlăm bruă mkra mjing vaccine leh anăn êa drao mdrao klei ruă tưp Covid-19.

Pô mblang: Y-Ƀel Êban