VOV4.Êđê- Hlăm klei nao čuă ala čar Russia, tlam mbruê 30/11 ti Moscow, Khua lăn čar Nguyễn Xuân Phúc mâo leh klei blŭ hrăm hŏng Khua mĭl čhil Russia Vladimir Putin. Hlăm klei blŭ hrăm anăn, 2 čô khua gĭt gai yap yuôm bhăn klei bi mguôp bruă lĭng kahan, klei êđăp ênang 2 ala čar dưi mâo lu boh tŭ dưn yuôm bhăn, bi msiam hĭn klei mjĕ giăm bruă kđĭ čar plah wah 2 ala čar leh anăn mñă klă ba klei bi mguôp bruă duh mkra jing kmeh gơ̆ng yuôm bhăn mơ̆ng klei mjĕ giăm Việt Nam – Russia.

Dua čô khua gĭt gai mñă klă. Pui kmlă leh anăn êa pui, êwa čuh jing sa hlăm dŭm boh phŭn hlăm klei bi mguôp hdră êlan kluôm ênŭm, ba wĭt klei jăk klă klơ̆ng kơ 2 ala čar. Bi ruê̆ klei blŭ hrăm anăn, Khua lăn čar Nguyễn Xuân Phúc leh anăn Khua mil čhil Putin mâo leh klei bi klă mbĭt hdră tă klei bi mguôp kluôm ênŭm Việt Nam – Russia truh thŭn 2030, kñăm tă êlan kơ klei bi mguôp 2 ala čar hlăm djăp mta bruă ƀrư̆ hruê ƀrư̆ êlam hĭn, klă klơ̆ng leh anăn mâo boh tŭ dưn hĭn, mâo ênŭm hnơ̆ng klei jăk sui kơ 2 ala čar, djuê ana, đru mguôp hlăm klei êđăp ênang leh anăn mđĭ kyar hlăm alŭ wăl, tar rŏng lăn.

Pô mblang: Y-Khem Niê