VOV4.Êđê - 12 mmông hruê mbruê, hluê si mmông Việt Nam, Khua lăn čar Nguyễn Xuân Phúc mbĭt hŏng mô̆ ñu ba anăp leh êpul bi ala gưl dlông Việt Nam truh kơ tač êdeh phiơr Geneva, klă klơ̆ng kčưm hlăm klei nao čuă ala čar Switz mơ̆ng hriê 25 – 29/11. Hlăm hruê tal êlâo nao čuă ala čar Switz, leh knăm tŭ drông, Khua lăn čar Nguyễn Xuân Phúc mâo leh klei blŭ hrăm hŏng Khua mĭl čhĭl Switz Guy Parmelin, bi tuôm hŏng khua gĭt gai lu ƀang ala čar Switz, nao hgŭm hlăm klei kƀĭn dŭm knơ̆ng bruă Việt Nam – Switz. Hlăm klei nao čuă anăn, Khua lăn čar nao čuă dlăng ƀuôn prŏng Bern, nao čuă khua gĭt gai êpul hgŭm ƀang Geneva, tŭ drông lu khua gĭt gai dŭm knơ̆ng bruă prŏng ti ala čar Switz, bi tuôm hŏng mnuih ƀuôn sang Việt Nam dôk hdĭp mda ti ala čar anei. Khua lăn čar ăt srăng bi tuôm hŏng dŭm êpul êya lu tĭng jing khua gĭt gai êpul hgŭm bruă mnia mblei tar rŏng lăn WTO, khua gĭt gai êpul bruă mdrao mgŭn tar rŏng lăn WHO, khua gĭt gai êpul bruă klei dưi kiă kriê mnơ̆ng dhơ̆ng tar rŏng lăn WIPO, khua gĭt gai êpul hgŭm klei čưng boh tar rŏng lăn FIFA.

Y -Bel pô mblang