VOV4.Êđê - Mlam mmăt hrue 2/12, tui si mmông alŭ wăl, Khua lăn čar Nguyễn Xuân Phúc lehanăn mô̆ ñu mbĭt hŏng êpul khua prŏng Việt Nam kbiă leh mơ̆ng ala čar Russia wĭt kơ lăn čar, mjưh ruĕ jăk siam klei nao čhưn kơ ala čar Russia, tui si klei jak iêo mơ̆ng khua Mil čhil Russia Putin. Hŏng giăm 30 mta bruă mơ̆ng khua lăn čar lehanăn lu bruă mơ̆ng dŭm phŭn dhar bruă mâo ngă leh hlăm gưl khua lăn čar Nguyễn Xuân Phúc nao čhưn anei ba wĭt klei tŭ dưn jăk hlăm djăp mta plah wah dua ala čar, mtrŭn agha êlam hĭn hlăm klei hgŭm kluôm dhuôm Việt Nam - Russia. Dua čô khua gĭt gai bi tŭ ư mđĭ bruă hgŭm duh mkra yap jing bruă knơ̆ng hlăm klei bi mguôp Việt Nam lehanăn Russia, lŏ dơ̆ng ngă tŭ jing klei kuôl kă hgŭm bruă duh mkra mnia mblei êngiê plah wah Việt Nam lehanăn Êpul hgŭm duh mkra Asi – Ơrôp, ăt mjing djăp klei găl hĭn kơ klei bi mnia mblei lehanăn duh bi liê dua nah, kñăm mjing klei mđĭ kyar ktang hĭn hlăm djăp mta bruă hgŭm. Gưl nao čhưn kơ Russia mơ̆ng khua lăn čar Nguyễn Xuân Phúc tal anei jing kñăm mđĭ hĭn klei bi hgŭm dua ala čar hlăm klei klă mngač hĭn jing mâo leh klei mklă mklơ̆ng mbĭt kơ boh yuôm bhăn klei bi hgŭm kluôm dhuôm Việt Nam -–Russia truh kơ thŭn 2030./.

Y-Khem pô mblang