VOV4.Êđê- Tlam mbruê, hluê si mmông alŭ wăl, Khua lăn čar Nguyễn Xuân Phúc mbĭt hŏng mô̆ ñu ba anăp êpul bi ala gưl dlông truh leh ti tač êdeh phiơr Vnukovo, ala čar Russia, kčưm hdră nao čuă ala čar Russia tui si klei iêo jak mơ̆ng Khua mĭl čhĭl Russia Vladimir Putin. Knăm tŭ drông Khua lăn čar dưi mkŏ mjing kdrưh k’ang ti tač êdeh phiơr Vnukovo.

Anei jing klei nao čuă yuôm bhăn bi klă 71 thŭn hruê Việt Nam leh anăn Russia mkŏ mjing klei mjĕ giăm, 20 thŭn hruê 2 ala čar bi klă jing ƀĭng hgŭm leh anăn giăm 10 thŭn mâo klei bi klă mbĭt mđĭ hĭn klei jing ƀĭng hgŭm kluôm ênŭm, mơ̆ng anăn dưi pŏk êlan bi mguôp mrâo plah wah 2 ala čar.

 Tui si hdră nao čuă, Khua lăn čar Nguyễn Xuân Phúc srăng mâo klei blŭ hrăm hŏng Khua mĭl čhĭl Russia, bi tuôm hŏng Khua knŭk kna Russia, khua gĭt gai DUMA ala čar Russia, khua gĭt gai êpul gơ̆ng ala čar Russia, mđup brei mêđai ƀĭng hgŭm kơ khua gĭt gai êpul gơ̆ng răng mgang klei êđăp ênang ala čar Russia, bi tuôm hŏng k’iăng khua gĭt gai êpul gơ̆ng răng mgang klei êđăp ênang ala čar Russia, khua gĭt gai Đảng ala čar Russia hluh hlir Dmitry Medvedev hŏng mô̆ gơ̆. Nao hgŭm leh anăn blŭ pŏk klei kƀĭn knơ̆ng bruă Việt Nam – Russia.

Pô mblang: Y-Khem Niê