VOV4.Êđê - Mmăt mbruê 28/12, ti ƀuôn prŏng Tam Kỳ, Khua lăn čar Nguyễn Xuân Phúc nao hgŭm leh hlăm knăm bi hdơr 550 thŭn pia anăn Quảng Nam (1471 – 2021). Blŭ hlăm knăm anăn, Khua lăn čar Nguyễn Xuân Phúc brei thâo, kbưi hŏng anei 550 thŭn, mtao Lê Thánh Tôn bi anăn kơ krĭng lăn Quảng Nam, hlăm anăn mâo 3 sang mtao: Thăng Hoa, Tư Nghĩa leh anăn Hoài Nhơn. Kyuanăn, knăm anăn mâo boh tŭ dưn yuôm bhăn hŏng Quảng Nam wăt kơ Đà Nẵng, Quảng Ngãi, Bình Định leh anăn alŭ wăl krĭng kwar krah. Quang Nam jing anăn pia bi êdah klei dlăng kbưi, ƀuh prŏng kơ ala čar Việt Nam ăt msĕ hŏng klei hmăng hmưi djuê ana. Êlâo kơ anăn, tlam mbruê 28/12, Khua lăn čar Nguyễn Xuân Phúc bi tuôm leh hŏng phung khua bruă Đảng mơ̆ng thŭn 1997 truh kơ ară anei. Bi êdah dŭm lei lông dlăng hŏng Quang Nam ară anei msĕ si klei bi hmô bruă duh mkra dôk điêt, ênoh prăk ba wĭt kah knar grăp čô ƀiă hĭn mkă hŏng ênoh kah knar hlăm ala čar, êlan klông dôk dleh dlan, hnơ̆ng gŏ sang ƀun ƀin dôk lu hŏng 4,25%, hnơ̆ng tŭ jăk mnuih mă bruă dôk ƀiă. Khua lăn čar Nguyễn Xuân Phúc mtă: čiăng mâo sa klei mĭn, sa klei hmăng hmưi mơ̆ng mnuih ƀuôn sang Quảng Nam hlăm hruê mmông kơ anăp.

Y-Ƀel pô mblang