VOV4.Êđê- Aguah mbruê 18/11, ti Hà Nội, Khua lăn čar Nguyễn Xuân Phúc nao hgŭm leh hlăm knăm bi hdơr 70 thŭn hruê mkŏ mjing sang hră gưl prŏng mtô mjuăt phung nai Hà Nội leh anăn tŭ mă međai klei mă bruă mrô 1 gưl tal 1. Bi ala kơ Đảng, knŭk kna, Khua lăn čar Nguyễn Xuân Phúc mâo klei hơêč hmưi kơ dŭm gưl phung knuă druh, phung nai, phung bruă bruă, hđeh sang hră ti sang hră gưl prŏng mtô mjuăt phung nai Hà Nội kyua dŭm boh tŭ dưn dưi mâo leh hlăm 70 thŭn êgao. Mñă klă, Đảng leh anăn knŭk kna bi klă nanao bruă mtô mjuăt bi hriăm, klei kreh knhâo mrâo mrang jing hdră mrô 1 hlăm ala čar. Khua lăn čar Nguyễn Xuân Phúc lač klă, Sang hră gưl prŏng mtô mjuăt phung nai Hà Nội jing sa hlăm 2 boh sang hră kdlưn hĭn hlăm ala čar. Lŏ lač kơ klei blŭ “Leh sang hră đĭ kyar, jih jang srăng đĭ kyar”. Khua lăn čar mtă kơ Sang hră gưl prŏng mtô mjuăt phung nai Hà Nội kñăm bi leh klei bi hmô kơ klei mă bruă, lŏ bi klă kơhưm pô jing sang hră kdlưn hĭn, mlih mrâo kluôm ênŭm kơ hdră êlan leh anăn mta phŭn mtô mjuăt čiăng rơ̆ng mâo ênŭm hnơ̆ng čoh čuăn ară anei.

Pô mblang: Y-Ƀel Êban