VOV4.Êđê - Hruê mbruê 26/12, ti Hà Nội mkŏ mjing leh klei kƀĭn kluôm phung bi ala pô mgang kđi kluôm ala čar tal 3. Nao hgŭm leh anăn blŭ hlăm klei kƀĭn anăn, Khua lăn čar Nguyễn Xuân Phúc mâo klei pah mni, yap yuôm bhăn êpul pô mgang kđi hlăm ala čar mâo leh klei gĭr ngă bruă, klei đru mguôp, răng mgang klei djŏ, klei dưi êngiê anak mnuih, klei dưi êngiê dŭm anôk bruă, đru hlăm klei đĭ kyar bruă duh mkra ala ƀuôn hlăm ala čar, mlih mrâo klei bhiăn, mkŏ mjing leh anăn bi kluôm ênŭm ala čar yang ƀuôn ngă phŭn êngiê Việt Nam.

Khua lăn čar brei thâo, Đảng, knŭk kna mâo nanao klei uêñ mĭn kơ êpul phung mgang kđi, mđĭ ênoh mnuih mă bruă leh anăn hnơ̆ng tŭ jăk hlăm klei mă bruă knuă. Tal êlâo hĭn, phung mgang kđi čiăng mâo klei êngiê, ênuah ênô, mpŭ kơ klei sĭt nik, ngă djŏ klei bhiăn ala čar, klei kpă ênô hlăm klei ngă bruă, pô mgang kđi mâo bruă klam răng mgang jăk hĭn klei dưi, klei jăk kơ mnuih ƀuôn sang, êpul êya, mbĭt anăn răng mgang klei bhiăn yan ƀuôn ngă phŭn, răng mgang klei jăk djŏ mơ̆ng knŭk kna.

Y -Ƀel pô mblang