VOV4.Êđê - Hrue mbrue (9/1), Êpul hgŭm phung čih klei yăl dliê Việt Nam mkŏ mjing leh mtrŭt mjhar čih klei yăl dliê kơ hđeh êlăk. Blŭ hrăm ti anôk mtrŭt mjhar anăn, Khua lăn čar Nguyễn Xuân Phúc bi myuôm bruă Êpul hgŭm phung čih klei yăl dliê kơ hđeh êlăk, lehanăn lač, anei jing bruă yuôm bhăn. Kyuadah bruă čih klei yăl dliê yơh jing anôk mđĭ ai kơ ai tiê klei mĭn hđeh tui tiŏ klei ênuah, mâo klei thâo pap, bŏ hŏng klei thâo khăp, lehanăn mjuăt ai tiê thâo gĭr, thâo kpưn đĭ mơ̆ng anak mnuih, boh nik hlăm phung hđeh gưl mrâo.

Khua Êpul hgŭm phung čih klei yăl dliê Việt Nam Nguyễn Quang Thiều brei thâo, klei mtrŭt mjhar čih klei yăl dliê kơ hđeh jing bruă mâo tă hlăm 5 thŭn (Mơ̆ng ară anei hlŏng truh mlan 5/2025) hŏng dua mta hdră čih klei yăl dliê, lehanăn klei duê. Phung nao hlăm klei bi lông jing jih jang mnuih Việt Nam hdĭp hlăm ala čar lehanăn ti ala tač êngao. Êpul mkŏ mjing mđĭ ai hĭn kơ phung hđeh nao hlăm klei bi lông anei mơh. Knăm mđup brei klei pah mni năng ai srăng mkŏ mjing hlăm wưng (mlan pŭr yan hla luh) thŭn 2023./.

Y-Khem pô mblang