VOV4.Êđê- Dôk hlăm dŭm hdră bi hdơr 60 thŭn hruê Awa Hô wĭt čhưn kơ ƀuôn sang gưl tal 2 (8/12/1961-8/12/2021), hruê 12/12, ti Wăl knhuah gru Kim Liên, să Kim Liên, kdriêk Nam Đàn, čar Nghệ An mkŏ mjing leh Knăm bi hdơr 60 thŭn hruê Awa Hô wĭt čhưn kơ ƀuôn sang gưl tal 2 lehañ mphŭn ba yua Sang bi hdơr kơ Khua gĭt gai Hồ Chí Minh hlăm wăl anôk knhuah gru.

Blŭ hrăm ti knăm anei, Khua lăn čar Nguyễn Xuân Phúc brei thâo, dăl hlăm klei hdĭp mă bruă kgŭ krŭ kdơ̆ng, Awa myơr leh klei hdĭp pô mă bruă kơ lăn čar, Đuê̆ mơ̆ng ƀuôn sang dơ̆ng mơ̆ng thŭn 1906 truh kơ mmômg jing Khua kiă kriê Đảng lehanăn Knŭk kna, Awa Hô knŏng wĭt čuă kơ ƀuôn sang 2 blư̆, ƀiădah Ñu ăt ba m’ĭt klei khăp, mâo nanao klei hnĭng ênguôt kơ ƀuôn sang hluê hŏng dŭm pŏk hră m’ĭt, klei čih kơ ƀuôn sang, dŭm blư̆ dưi bi blŭ hrăm hŏng mnuih ƀuôn sang, phung knuă druh, Đảng viên čar Nghệ An. Khua lăn čar mñă klă, Đảng, Knŭk kna lehanăn mnuih ƀuôn sang drei ăt hdơr nanao kơ klei đru mguôp prŏng prĭn mơ̆ng amĭ ama, mơ̆ng gŏ sang lehanăn găp djuê tĭng kơ amĭ, kơ ama mơ̆ng Ñu kkiêng, rông ba, mjuăt bi hriăm leh sa čô anak prŏng kdrưh êdi mơ̆ng djuê ana Việt Nam – Khua gĭt gai Hồ Chí Minh khăp h’iêng./.

Pô mblang: H’Nêč Êñuôl