VOV4.Êđê- Tlam mbruê 6/12, ti sang bruă Khua lăn čar, Khua lăn čar Nguyễn Xuân Phúc tŭ drông leh khua bruă kƀĭn ala Lao Saysomphone Phomvihane bri wưng ba anăp êpul bi ala gưl dlông bruă kƀĭn ala Lao hriê čuă ala čar Việt Nam. Hlăm klei tŭ drông anăn, Khua lăn čar yap yuôm klei blŭ hrăm plah wah khua bruă kƀĭn ala Lao Saysomphone Phomvihane hŏng Khua bruă kƀĭn ala Vương Đình Huệ. Bi đru hlăm klei lông dlăng ară anei, boh nik dŭm klei hmăi mơ̆ng klei ruă tưp Covid-19, Khua lăn čar yap yuôm bhăn dŭm anôk bruă djŏ tuôm 2 ala čar mâo leh klei bi mguôp mâo boh tŭ dưn hlăm bruă bi mdrơ̆ng hŏng klei ruă tưp leh anăn čiăng lŏ rơ̆ng kjăp hlăm hruê mmông kơ anăp. Khua lăn čar ăt bi klă hdră êlan mơ̆ng Việt Nam jing mđĭ kyar klei bi mguôp Việt Nam – Lao. 2 ala čar jing mah jiăng, ayŏng adei “mâo braih mbha braih, mâo djam mbha djam”. Khua lăn čar mñă kơ 2 Đảng, 2 knŭk kna leh anăn mnuih ƀuôn sang mtrŭt mđĭ klei bi mguôp 2 ala čar. Mprăp bi mguôp mkŏ mjing klei bi tuôm grăp tuôr 2 phŭn bruă kđi čar leh anăn klei kƀĭn tal 44 Dhar bruă knŭk kna Việt Nam – Lao.

Pô mblang: Y-Ƀel Êban