VOV4.Êđê- Tlam mbruê 29/11, hluê si mmông alŭ wăl, ƀri hlăm wưng nao čuă ala čar Switz, Khua lăn čar Nguyễn Xuân Phúc mâo leh klei bi tuôm hŏng khua phŭn bruă mdrao mgŭn Chile Oscar Enrique Paris ăt dôk nao ti ala čar Switz. Hlăm wưng klei ruă tưp Covid-19 tar rŏng lăn ară anei, bruă 2 ala čar mâo klei mjĕ giăm jăk siam jing tur knơ̆ng yuôm bhăn mtrŭt mđĭ klei bi mguôp hlăm bruă gang mkhư̆ klei ruă tưp.

Hơêč hmưi kơ Chile dưi ksiêm dlăng jăk klei ruă tưp, hnơ̆ng tlŏ mgang vaccine jing lu êdi, Khua lăn čar Nguyễn Xuân Phúc mñă kơ Chile đru mkăp brei vaccine kơ Việt Nam. Bi êdah klei sa ai hŏng Khua lăn čar Nguyễn Xuân Phúc kơ bruă mtrŭt mđĭ klei bi mguôp hlăm bruă gang mkhư̆ klei ruă tưp Covid-19, khua phŭn bruă mdrao mgŭn Chile brei thâo, Chile mprăp klei bi mguôp leh anăn kah mbha vaccine kơ Việt Nam. Mbĭt anăn jing mtrŭt mđĭ klei bi mguôp 2 ala čar hlăm bruă mdrao mgŭn.

Pô mblang: Y-Ƀel Êban