VOV4.Êđê- Tlam mbrue (13/12), ti anôk bruă khua lăn čar, Khua lăn čar Nguyễn Xuân Phúc drông leh 60 čô pô bi ala kơ phung nao ti anôk bi kƀĭn prŏng Mniê hlăm lĭng kahan tal 7, mrâo mjưh ruĕ hŏng klei tŭ jing ti Hà Nội. Blŭ hrăm ti anôk bi tuôm, Khua lăn čar bi mni kơ phung mniê hlăm lĭng kahan mâo nanao klei thâo gĭr, bi leh jăk bruă jao, lehanăn ngă jăk mơh bruă klam pô jing mniê, krơ̆ng nanao klei h’uh mđao kơ gŏ sang. Mniê lĭng kahan klă sĭt jing mnuih “thâo bruă ala čar, mbruă bruă pưk sang”. Hŏng êbeh 90 êbâo čô knuă druh, lĭng kahan mniê, lehanăn êbeh 2 êbâo hgŭm nah gŭ, êpul kahan mniê hlăk mâo hlăm djăp êpul êya kahan kluôm ala. Khădah ti anôk lehanăn hŏng ya mta bruă ngă, kahan mniê păn kjăp nanao knhuah jăk siam lĭng kahan awa Hô. Boh nik, wưng thŭn 2016 – 2021 gưl tal êlâo mâo leh 41 čô knuă druh, êpul mniê hlăm lĭng kahan nao đru răng mgang klei êđăp ênang mơ̆ng Êpul hgŭm lu ala čar. Hlăm bruă mdrơ̆ng hŏng klei ruă tưp mâo leh 1 êbâo 700 čô amai adei mniê ba anăp mơ̆ng lĭng kahan./.

Pô mblang: Y-Khem Niê