VOV4.Êđê- Khua lăn čar Nguyễn Xuân Phúc mâo leh klei bi trông hŏng khua bruă kƀĭn ala leh anăn Khua knŭk kna kơ hdră êlan mđĭ kyar kdrăp mrâo mrang, hlăm anăn mâo dŭm mta pui kmlă doh, pil leh anăn bi tŭ ư ba mdah hŏng bruă kƀĭn ala gưl anei dŭm hdră êlan ala čar đru kơ kdrăp mrâo mrang. Anei jing klei hâo hưn mơ̆ng Khua lăn čar tlam bruê 12/12 hlăm knăm pŏk kčưm bruă rŭ mdơ̆ng sang măi mkra mjing pil ôtô WinEs ti anôk bruă duh mkra Vũng Áng, čar Hà Tĩnh. Blŭ hlăm knăn anăn, Khua lăn čar Nguyễn Xuân Phúc brei thâo, klei tŭ jing mơ̆ng êpul grŭp Wingruop hlăm bruă ƀrư̆ ƀrư̆ jing êpul grŭp mrâo mrang, dưi đru mtrŭt mjhar kơ dŭm knơ̆ng bruă mkăn ti Việt Nam leh anăn mkŏ mjing sa wăl “Make-in-Vietnam” kơ bruă mkra mjing leh anăn yua pui mklă doh. Khua lăn čar Nguyễn Xuân Phúc lač klă, klei lông dlăng hlăm bruă đĭ kyar hŏng Việt Nam ară anei jing srăng mă anak mnuih, klei thâo leh anăn klei kreh knhâo mrâo mrang jing mta kñăm hlăm klei bi hmô đĭ kyar kjăp wưng sui. Anei jing kliăng čiăng kơ ala čar drei tlaih mơ̆ng ƀưi ênoh prăk ba wĭt kah knar, mâo klei đĭ kyar bruă duh mkra truh kơ klei mdrŏng sah mơ̆ng ala čar, djuê ana.

Pô mblang: Y-Ƀel Êban