VOV4.Êđê- Ƀrĭ wưng Việt Nam dưi bi leh tŭ jing wưng păn ngă khua djŏ tuôr hlăm Êpul gơ̆ng bruă răng mgang klei êđăp ênang mơ̆ng Êpul hgŭm lu ala čar wưng thŭn 2020 -2021, Khua lăn čar Nguyễn Xuân Phúc mrâo mâo klei mơĭt yuôm bhăn, hlăm anăn mñă klă, Việt Nam mprăp leh kơ bruă đru gui lu bruă klam dlông rŏng lăn kyua klei êđăp ênang leh anăn đĭ kyar kjăp. Bi lar kơhưm leh anăn ai dưi mrâo mơ̆ng ala čar hŏng klei gĭr ktưn, Việt Nam čŏng nao hgŭm leh anăn hur har, mâo lŭ klei kčĕ mrâo, đru mguôp klă klơ̆ng hlăm dŭm bruă mơ̆ng Êpul gơ̆ng bruă răng mgang klei êđăp ênang, hŏng klei hưn mthâo kluôm jing “ƀĭng hgŭm kyua klei êđăp ênang kjăp” hlăm bruă tui duah hdră êlan gang mkhư̆, mgiah msir klei mjhĭk mtŭl, bi mguôp Êpul gơ̆ng bruă răng mgang klei êđăp ênang hŏng ASEAN hluê êlan mpŭ kơ klei bhiăn mơ̆ng Êpul hgŭm lu ala čar leh anăn klei bhiăn tar rŏng lăn. Hlăm bruă anăn, ăt bi êdah Việt Nam mâo klei mlih mrâo, mbruă, mâo klei hưn mthâo kơ hdră tă, klei hmăng hmưi đĭ kyar ala čar truh thŭn 2045 dưi ba mdah leh hlăm klei kƀĭn kluôm Đảng tal 13. Hrăm mbĭt hŏng êpul êya tar rŏng lăn ară anei bi đru gui bruă klam tar rŏng lăn kyua klei êđăp ênang leh anăn mđĭ kyar kjăp.

Pô mblang: Y-Ƀel Êban