VOV4.Êđê- Tlam hruê 17/11, K’iăng khua anôk bruă kƀĭn ala Trần Thanh Mẫn mbĭt hŏng phung bi ala anôk bruă kƀĭn ala gưl XV čar Hâụ Giang mâo leh klei bi tuôm hŏng mnuih ƀuôn sang ti ƀuôn prŏng Vị Thanh, kdriêk Vị Thủy, Châu Thành lehanăn Châu Thành A.  Ti anôk bi tuôm anei, mnuih ƀuôn sang bi êdah klei sa bi, bi mni kơ dŭm boh tŭ Klei bi kƀĭn tal 2, Anôk bruă kƀĭn ala gưl XV, mbĭt anăn hưn mdah klei blŭ, klei akâo čiăng truh hŏng phung bi ala anôk bruă kƀĭn ala.

Blŭ hrăm ti knăm anei, K’iăng khua anôk bruă kƀĭn ala Trần Thanh Mẫn čih yap lehanăn bi mni kơ dŭm boh tŭ mâ- čar Hậu Giang mâo leh hlăm wưng êgao, mbĭt anăn ăt hưn mdah klei dleh dlan, lông dlăng hmăi truh kơ hdră duh mkra – ala ƀuôn ti alŭ wăl. Kơ dŭm klei akâo čiăng mơ̆ng mnuih ƀuôn sang djŏ tuôm kơ bruă mdrao mgŭn, K’iăng khua anôk bruă kƀĭn ala hâo hưn, knŭk kna srăng ba mdah hdră êlan kluôm kñăm gang mkhư̆, mdrơ̆ng hŏng klei ruă Covid 19, ksiêm dlăng, ba dŭm kdrăp mnơ̆ng yua hlăm bruă mdrao mgŭn mŭt hlăm hdră bi h’ĭt ênoh čhĭ. Mâo hdră msir tŭ dưn ƀrư̆ bi hrŏ klei bi kpleh hnơ̆ng tŭ ksiêm mkă dlăng, mdrao klei ruă plah wah dŭm krĭng kwar./.

                                                    Pô mblang: H’Nêč Êñuôl