VOV4.Êđê -  Ruĕ tlam mbrue (27/12), ti Sang Bruă kƀĭn ala, k’iăng khua bruă kƀĭn ala Trần Thanh Mẫn bi tuôm leh hŏng 55 čô phung bi ala nao ti anôk bi kƀĭn phung êdah êdi “kyua klei ruă Diosin” tal 4, wưng thŭn 2021 – 2026. Leh hmư̆ klei hâo mdah mơ̆ng phung bi ala ti anôk bi tuôm anăn, K’iăng khua bruă kƀĭn ala mñă, klei bi blah hŏng êa drao ruă Mi ngă hlăm klei bi blah ti Việt Nam ngă leh kơ êbeh 4 êklăk 800 êbâo čô mnuih Việt Nam djŏ mta ruă, lehanăn hlăm brô 3 êklăk čô mnuih jing boh mơ̆ng klei ruă anei. Hdră mghaih msir mơ̆ng mta ruă anei mơ̆ng klei bi blah jing leh bruă mjêč, lehanăn nga nanao, hŏng klei thâo bi đru prŏng, jing bruă klam mơ̆ng jih yang ƀuôn, kñăm hdơr knga nanao kơ phung tuôm găn leh hlăm eneuk bi blah djŏ hĕ êa drao ruă diosin. K’iăng khua Bruă kƀĭn ala mtă kơ dŭm gưl bruă Đảng, bruă sang čư̆ êa lehanăn jih jang bruă kđĭ čar lŏ dơ̆ng ngă jăk hdră êlan mơ̆ng Đảng, knŭk kna hŏng phung djŏ êa drao ruă diosin, mjing djăp klei găl kơ Êpul hgŭm phung djŏ êa drao ruă diosin djăp gưl bi leh jăk bruă Đảng, knŭk kna jao hlăm ênuk ară anei./.

Y-Khem pô mblang