VOV4.Êđê- Aguah hruê 6/12, ti anôk bruă Knŭk kna, Khua hlăm Anôk bruă Đảng gưl dlông, K’iăng khua knŭk kna Lê Minh Khái drông leh Choi Joo Ho, Khua knơ̆ng êpul bruă Samsung Việt Nam.

Mñă klă klei bi mjĕ jăk siam ară anei plah wah dua ala čar Việt Nam - Dhŭng Korea, boh nik hlăm bruă: Duh mkra, mnia mblei 2 nah, hdră mă bruă, ODA, hlăm boh tŭ anăn, mâo klei đru mguôp mơ̆ng anôk bruă duh mkra dua ala čar, boh nik Samsung – phung duh bi liê ala tač êngao prŏng hĭn ti Việt Nam, K’iăng khua knŭk kna Lê Minh Khái bi mni kơ boh tŭ hdră mă bruă duh mkra, mnia mblei tŭ dưn mơ̆ng Samsung ti Việt Nam, boh nik hlăm wưng dleh dlan kyua hmăi mơ̆ng klei ruă Covid 19, dŭm hdră duh mkra, mnia mblei mơ̆ng Samsung hlăm djăp bruă đĭ mkă hŏng wưng anei thŭn êlâo. Khua knơ̆ng êpul bruă Samsung Việt Nam Choi Joo Ho brei thâo, truh kơ ară anei, êpul group duh bi liê leh hlăm Việt Nam truh 17,74 êklai USD, ênoh mă yua mâo 100% ênoh prăk mâo bi mklă./.

                                                    Pô mblang: H’Nêč Êñuôl