VOV4.Êđê- Tlam mbrue (29/12), k’iăng khua knŭk kna Lê Minh Khái nao ti anôk bi kƀĭn hlue ngă bruă knuă knơ̆ng prăk thŭn 2022. K’iăng khua knŭk kna bi myuôm bruă knơ̆ng prăk hlăm thŭn êgao, mâo leh truh 5 êbâo êklai prăk đru kơ dŭm bruă klei hdĭp mda ala ƀuôn hlăm kluôm ala, hlăm anăn kah leh êbeh 3 êklai 200 êklăk prăk đru kơ bruă mdrơ̆ng hŏng klei ruă tưp Covid 19.

Thŭn mrâo 2022, k’iang khua knŭk kna lač, bruă knơ̆ng prăk lŏ dơ̆ng bi hrŏ ênoh prăk mnga brei čan, boh nik hŏng dŭm bruă dôk čiăng mjêč. Mđĭ boh tŭ bruă brei čan prăk, lehanăn ktuh êyuh ngăn prăk kơ bruă duh mkra mnia mblei, čiăng mđĭ kyar djăp mta bruă nah gŭ. Ngă tŭ jing jih jang bruă brei čan đru kơ phung ƀuôn sang, phung duh mkra dôk tuôm hŏng klei dleh dlan. K’iăng khua knŭk kna Lê Minh Khái mtă kơ knơ̆ng prăk mđĭ hĭn bruă brei čan kơ phung blei mprăp mnơ̆ng mnua yua, kñăm bi hrŏ klei čan lĭng kơ êngao hŏng mnga ktrŏ, lehanăn tuôm hŏng phung mplư, duah brei čan hŏng kdrăp mrâo mrang./.

Pô mblang: Y-Khem Niê