VOV4.Êđê- Ti anôk bruă knŭk kna, k’iăng Khua knŭk kna Lê Văn Thành mâo leh klei bi tuôm hŏng k’iăng khua bruă kƀĭn ala Lao Sommad Pholsena ƀri wưng mbĭt hŏng khua bruă kƀĭn ala Lao Saysomphone Phomvihane hriê čuă ala čar Việt Nam. K’iăng Khua knŭk kna Lê Văn Thành mñă klă, Đảng, knŭk kna leh anăn mnuih ƀuôn sang Việt Nam dlăng yuôm bhăn bruă bi kjăp leh anăn bi mguôp kluôm ênŭm Việt Nam – Lao, k’iăng Khua knŭk kna Lê Văn Thành lŏ mñă klă, hŏng klei ngă bruă pô, srăng gĭr jih ai bi kjăp, mđĭ kyar klei mjĕ giăm mâo leh dŭm gưl khua gĭt gai 2 ala čar mkŏ mjing. K’iăng khua bruă kƀĭn ala Lao Sommad Pholsena brei thâo, anei jing klei hriê čuă ala čar Việt Nam tal êlâo hĭn mơ̆ng hruê păn bruă, bi êdah klei lăč jăk kyua Đảng, knŭk kna leh anăn mnuih ƀuôn sang Việt Nam mâo klei sa ai, đru kơ ala čar Lao. Boh nik Đảng, knŭk kna leh anăn mnuih ƀuôn sang Việt Nam rŭ mdơ̆ng leh sang bruă kƀĭn ala mrâo mđup brei kơ Đảng, bruă kƀĭn ala, knŭk kna leh anăn mnuih ƀuôn sang Lào.

Pô mblang: Y-Ƀel Êban