VOV4.Êđê - Aguah mbrue (15/12), ti anôk bruă knŭk kna, k’iăng khua knŭk kna Lê Văn Thành kiă kriê leh klei bi kƀĭn online, ksiêm dlăng, mtrŭt mjhar, ruh mgaih klei dleh dlan, gun kpăk, mđĭ hĭng bruă duh bi liê ngăn prăk thŭn 2021. Tui si klei hâo mdah mơ̆ng phŭn bruă ngăn prăk, hŏng 12 phŭn, dhar bruă, anôk bruă gưl dlông lehanăn dŭm alŭ wăl dôk hlăm bruă ksiêm dlăng, yap truh hrue 30/11/2021 mâo brei čan leh truh 28 êbâo êklai prăk, knŏng mrâo djăp mă mil 36%. Mâo đa đa phŭn, anôk bruă gưl dlông lehanăn alŭ wăl mâo hnơ̆ng ênoh brei čan adôk ƀiă: Phŭn bruă duh mkra mnia mblei, phŭn bruă rŭ mdơ̆ng, ƀuôn prŏng Hồ Chí Minh... Boh nik, ăt adôk mâo dŭm phŭn dhar bruă ka bi lar ênŭm mơh djŏ hŏng hdră jao. Bi prăk ti alŭ wăl, adôk truh 12 alŭ wăl ka dưn yua djŏ hŏng hdră kčah ôh mâo leh klei khua knŭk kna jao. Ti anôk bi kƀĭn, dŭm phŭn dhar bruă gưl dlông lehanăn alŭ wăl mâo klei akâo lu jing djŏ tuôm hlăm hdră thŭn 2021, jing brei klei dưi lŏ tư̆ hdui hdră ba yua ngăn prăk duh bi liê kơ thŭn 2021 nao kơ thŭn 2022./.

Y-Khem pô mblang