VOV4.Êđê - Aguah 22/12, Khua hlăm Phŭn bruă kđi čar, K’iăng Khua knŭk kna Phạm Bình Minh mbĭt hŏng êpul mă bruă nao čhưn, mđup brei leh anăn hơêč hmưi Noel ti Anôk dlăng bruă klei đaŏ khop Huế, nao chưn leh anăn Hơêč hmưi Noel ti krĭng đaŏ khop Phú Cam Huế. Bi ala kơ Khua gĭt gai Đảng leh anăn Knŭk kna K’iăng Khua knŭk kna Phạm Bình Minh hơêč hmưi klei suaih pral, mđup brei mnơ̆ng leh anăn mnga hơêč hmưi Noel kơ Khua kiă kriê anôk bruă klei đaŏ Khop Nguyễn Chí Linh, Khua dlăng bruă krĭng đaŏ Khop Huế, Khua Êpul hgŭm anôk bruă klei đaŏ Khop Việt Nam, hơêč hmưi kơ khua dlăng bruă klei đaŏ leh anăn jih jang mnuih hluê đaŏ ti Huê drông sa yan Noel jăk mơak leh anăn thŭn mrâo 2022 êđăp ênang. Mbĭt anăn, čang hmăng phung khua dlăng bruă klei đaŏ leh anăn phung đaŏ khop lŏ dơ̆ng mđĭ lar knhuah gru khăp kơ ala čar, hrăm mbĭt hŏng djuê ana, mđĭ lar klei tŭ jing dưi mâo, bruă klam mnuih ƀuôn sang, đru mguôp lu hĭn hlăm bruă mkŏ mjing sa lăn čar Việt Nam kyua hdră kñăm mnuih ƀuôn sang mdrŏng sah, ala čar kjăp ktang, êngiê, mtăp mđơr, jăk mơak.

H’Zawut pô mblang