VOV4.Êđê - Mmăt hruê 21/11, ti Hà Nội, Knơ̆ng bruă êlan klông ala čar mkŏ mjing  Knăm bi hdơr kơ phung djiê hlăm klei bi drăm hlăm êlan klông. Nao hlăm knăm anei mâo K’iăng Khua Knŭk kna Phạm Bình Minh. Hŏng klei blŭ “Hdơr kơ phung đuê̆ nao - kyua phung dôk hdĭp”, anei jing thŭn tal 10 klei anei dưi mkŏ mjing ti Việt Nam leh anăn jing thŭn tal 2 Knơ̆ng bruă êlan klông ala čar mkŏ mjing hdră “Ƀĭng găp hlăm ktuê êlan” hŏng “Knăm bi hdơr phung djiê hlăm klei bi drăm hlăm êlan klông”. Blŭ hrăm hlăm knăm anei, K’iăng Khua knŭk kna Phạm Bình Minh iêu mthưr mnuih ƀuôn sang hrăm mbĭt sa ai tiê hluê ngă bi jăk Hdră bhiăn hlăm êlan klông čiăng amâo lŏ mâo ôh dŭm klei bi drăm hlăm êlan klông bŏ hŏng ênguôt hnĭng. Knăm bi hdơr phung djiê hlăm klei bi drăm hlăm êlan klông dưi mkŏ mjing grăp thŭn jing klei bi jih hŏng găp djuê dŭm gŏ sang mâo mnuih djiê hlăm klei bi drăm leh anăn klei hưn brei răng kơ êpul êya kơ klei thâo săng sĭt găn êrô hlăm êlan klông čiăng răng mgang klei hdĭp.

H’Zawut pô mblang