VOV4.Êđê - Aguah mbrue (27/12), Phŭn bruă êlan klông hgŭm hŏng knơ̆ng bruă sang čư̆ êa čar Lai Châu mkŏ mjing knăm mphŭn rŭ mkra êlan dơ̆ng mkŏ hŏng dŭm čar čư̆ čhiăng nah Dưr. Bruă mkra êlan anei liê jih jang êbeh 5 êbâo 300 êklai prăk, čiăng bi hrŏ êwang găn nao plah wah dŭm čar Lai Châu, Lào Cai, Yên Bái lehanăn dŭm alŭ wăl mkăn djŏ tuôm hŏng ƀuôn prŏng phŭn Hà Nội.

Blŭ ti anôk mkŏ mjing knăm anei, K'iăng khua knŭk kna Phạm Bình Minh lač, bruă kñăm mơ̆ng klei mkra êlan anei jing kñăm mđĭ kyar klei duh mkra ala ƀuôn kơ dŭm čar mâo êlan, lehanăn dŭm alŭ wăl Yŭ Dưr. Čiăng kơ êlan mâo mkra hŏng klei jăk, k'iăng khua knŭk kna mtă kơ pô djă akŏ Phŭn bruă êlan klông, Êpul kiă kriê bruă mkra êlan mrô 2, bi ksiêm dlăng, kiă kriê kjăp bruă mkra êlan, mâo hnơ̆ng kjăp, djŏ wưng kčah, djăp prăk bi liê hlăm jih kdrêč mkra êlan, djŏ tui si hdră bhiăn./.

Y-Khem pô mblang