VOV4.Êđê - Tlam hruê 28/12, K’iăng khua knŭk kna Lê Văn Thành nao ksiêm dlăng leh lăn lehanăn mă bruă hŏng čar Lâm Đồng mbĭt hŏng dŭm Phŭn, dhar bruă djŏ tuôm kơ hdră mprăp Duh bi liê hdră bruă êlan êran pral kdrêč Tân Phú (Đồng Nai) - Bảo Lộc (Lâm Đồng) lehanăn Bảo Lộc - Liên Khương.  Hdră êlan êran pral kdrêč Tân Phú - Bảo Lộc mâo boh dlông 66km, hlăm anăn 11km dôk hlăm čar Đồng Nai lehanăn 55km dôk hlăm čar Lâm Đồng. Anei jing 1 hlăm 3kdrêč êlan hlăm hdră bruă êlan êran pral Dầu Giây – Liên Khương.

Hdră anei dưi duh bi liê hlăm 2 wưng, tĭng srăng ngă leh dưi ba yua hlăm thŭn 2025. Blŭ hrăm ti knăm anei, K’iăng khua knŭk kna Lê Văn Thành bi mni kơ bruă čar Lâm Đô̆ng pral iêu mtrŭt klei đru hlăm yang ƀuôn mơ̆ng dŭm anôk bruă duh mkra lehanăn sa kdrêč mơ̆ng alŭ wăl, amâo ba yua ngăn prăk knŭk kna hlăk hluê ngă hdră duh bi liê êbeh 140 km êlan êran pral. Mbĭt anăn, mtă kơ dŭm phŭn, dhar bruă djŏ tuôm mđing đru kơ čar ruh mtlaih klei dleh dlan, bi leh hră m'ar djŏ si klei kčah mtrŭn čiăng hnưm dưi ngă mkra, bi leh djŏ si hdră kčah./.

H’Nêč pô mblang