VOV4.Êđê- Phŭn bruă êlan klông dŭ mdiăng, knơ̆ng bruă êdeh phiơr leh anăn dŭm phŭn, dhar bruă djŏ tuôm hưn mdah hŏng phung khua gĭt gai, mđĭ bruă mprăp lŏ wĭt pŏk dŭm êlan phiơr bruă mnia blei dlông rŏng lăn, mâo hdră čiăng kơ mnuih Việt Nam ti ala tač êngao blei hră wĭt ala čar, msir mgaih hnưm leh anăn găl ênưih klei čiăng wĭt kơ ala čar djŏ klă mơ̆ng mnuih ƀuôn sang. Anei jing klei mtă mơ̆ng K’iăng Khua Knŭk kna Vũ Đức Đam, K’iăng Khua anôk bruă ala čar gang mkhư̆ klei ruă Covid-19 hlăm mmông mă bruă hŏng Phŭn bruă mdrao mgŭn, anôk bruă djŏ tuôm kơ klei mnuih Việt Nam dôk ti ala tač êngao, mnuih ala tač êngao hriê ti Việt Nam mkŏ mjing tlam 8/12. Mơ̆ng klei blŭ mguôp mơ̆ng dŭm Phŭn, dhar bruă, K’iăng Khua Knŭk kna Vũ Đức Đam mñă klă: êngao kơ klei čiăng drông phung thơ̆ng kơ bruă, phung ngă bruă, mnuih mă bruă hdră mnêč thâo mbruă mơ̆ng ala tač êngao, phung tuê hiu čhưn ala tač êngao kơ klei mđĭ kyar bruă duh mkra - ala ƀuôn, dŭm phŭn, anôk bruă brei mđing kơ klei mnuih ƀuôn sang Việt Nam nao mă bruă ti ala tač êngao, hriăm hră, mă bruă, nao čuă găp djuê kpăk đuôm ti ala tač êngao kyua klei ruă tưp, ăt msĕ mơh mnuih ƀuôn sang Việt Nam hdĭp mda ti ala tač êngao hŏng găp djuê dưi dưn klei đru msĕ si mnuih Việt Nam hluê si hdră kčah.

Pô mblang: H’Zawut Ƀuôn Yă