VOV4.Êđê- Aguah hruê 1/12, ti Hà Nội mkŏ mjing leh Klei bi kƀĭn kluôm ala Êpul hgŭm mtrŭt mđĭ ai klei hriăm hră Việt Nam tal 6 lehanăn bi hdơr 25 thŭn hruê mkŏ mjing Êpul. K’iăng khua knŭk kna Vũ Đức Đam nao leh ti knăm anei. 25 thŭn êgao, Êpul hgŭm mtrŭt mđĭ ai klei hriăm hră Việt Nam amâo mdei gĭr ktưn, mlih mrâo, iêu mtrŭt djăp ai dưi, klei mâo mđĭ kyar Keh mtrŭt mđĭ ai klei hriăm hră, mđup brei dŭm êklăk hnư prăk đru hriăm hră kơ phung hđeh; phung nai mtô, đru kơ phung hđeh ƀun gĭr ktưn hriăm hră jăk hĭn. Ti knăm anei, K’iăng khua knŭk kna Vũ Đức Đam  mñă klă, hlăm uưng êgao, bruă mtô bi hriăm ti dŭm gưl ƀrư̆ dưi mkra mđĭ, klei anei bi êdah kluôm Đảng lehanăn mnuih ƀuôn sang mâo klei mđing hĭn kơ klei hriăm hră m’ar. K’iăng khua knŭk kna Vũ Đức Đam mtă: Êpul hgŭm mtrŭt mđĭ ai klei hriăm hră Việt Nam bi hgŭm hŏng dŭm phŭn, dhar bruă bi leh dŭm hdră bruă kñăm bi mlih mrâo kluôm dhuôm hdră mtô bi hriăm mâo Đảng kčah mtrŭn. K’iăng khua knŭk kna Vũ Đức Đam đăo knang hŏng klei lŏ čuê lehanăn mđĭ kyar, Êpul srăng đĭ kyar hĭn lehanăn đru mguôp hlăm hdră mkŏ mkra lehanăn răng mgang ala čar./.

Pô mblang: H’Nêč Êñuôl