VOV4.Êđê - Aguah 26/11, ti Anôk bruă Khua lăn čar, K’iăng Khua lăn čar Võ Thị Ánh Xuân bi kƀĭn Êpul hgŭm răng mgang keh đru kơ hđeh êlăk Việt Nam. Mơ̆ng akŏ thŭn truh ară anei, Keh đru kơ hđeh êlăk Việt Na, đru leh êbeh 98 êbâo gưl čô hđeh hŏng ênoh bi liê êbeh 61 êklai prăk. Hlăm anăn mkŏ mjing ksiêm mkă mbha dŭm mta klei ruă kboh mơ̆ng tian amĭ, amâo jăk hlăm jơ̆ng kngan, hlăm ală kơ 1 êbâo 200 čô hđeh mnuih djuê ƀiă, phung hđeh hlăm gŏ êsei ƀun, giăm ƀun krĭng čư̆ čhiăng. Prăk đru kơ phung hđeh giăm 6 êklai 9 êtuh êklăk prăk, hŏng êbeh 20 êbâo čô hđeh dưi dưn. Boh nik, kyua hmaĭ mơ̆ng klei ruă Covid-19, Keh đru leh êbeh 18 êklai prăk kơ êbeh 14 êbâo čô hđeh. Phung dưi dưn  klei đru jing phung hđeh mâo klei hdĭp dleh dlan amâodah phung hđeh jing gŏ êsei ƀun, giăm ƀun, phung hđeh jing anak čô mnuih mă bruă, ƀĭng ngă lŏ hma luič bruă mă leh anăn phung hđeh mrâo kkiêng mâo amĭ djŏ klei ruă Covid-19. K’iăng Khua lăn čar Võ Thị Ánh Xuân hlăm klei bi kƀĭn iêô mthưr leh phung hlăm Êpul hgŭm đru kơ phung hđeh mđĭ lar hĭn bruă klam pô čiăng iêo mkrum klei găl jăk hĭn đru kơ phung hđeh mâo klei hdĭp dleh dlan hĭn./.

H’Zawut pô mblang