VOV4.Êđê- Aguah 29/12, ti Hà Nội, Anôk bruă kriê dlăng msat Khua gĭt gai Hồ Chí Minh mkŏ mjing knăm tŭ mă Mêdai mnuih mă bruă mrô dua; ksiêm wĭt bruă klam thŭn anei leh anăn pŏk ngă bruă klam thŭn kơ anăp. K’iăng Khua lăn čar Võ Thị Ánh Xuân nao hlăm klei bi kƀĭn. Hlăm wưng êgao, Anôk bruă kriê dlăng Msat khua gĭt gai Hồ Chí Minh bi leh bruă klam dưi jao, asei atâo Khua gĭt gai Hồ Chí Minh leh 50 thŭn dưi răng kriê jăk, ka mâo ôh klei bi mlih mkă hŏng dŭm ênoh mrô hlăm hră mơar ksiêm dlăng asei atâo mơ̆ng dŭm Êpul êlâo adih. Mơ̆ng hruê pŏk ƀăng Msat truh ară anei, anôk bruă drông, ngă bruă jăk, êđăp ênang, jih hnơ̆ng êđăp ênang 324 knăm nao čuă gưl knŭk kna, 427 êpul phung khua păn akŏ ala čar leh anăn giăm 60 êklăk gưl tuê, hlăm anăn mâo êbeh 10 êklăk gưl tuê ala tač êngao nao čang ti msat Khua gĭt gai Khua gĭt gai Hồ Chí Minh. Bi ala kơ khua gĭt gai Đảng, Knŭk kna, K’iăng Khua lăn čar Võ Thị Ánh Xuân mđup brei leh Medai Mnuih mă bruă mrô dua kơ Anôk bruă kriê dlăng msat Khua gĭt gai Hồ Chí Minh.

Pô mblang: H’Zawut Ƀuôn Yă