VOV4.Êđê - Aguah hruê 28/12, ti Hà Nội, Êpul hgŭm mnuih djŏ drao ruă dioxin Việt Nam mkŏ mjing leh Knăm bi hdơr 60 thŭn klei truh jŭ jhat drao ruă dioxin Việt Nam (10/8/1961-10/8/2021); tŭ mă Medai ngă bruă mrô 3 lehanăn Klei bi kƀĭn gru mngač êdah kdlưn phung djŏ drao ruă dioxin tal 4, wưng thŭn 2016 – 2021. K’iăng khua lăn čar Võ Thị Ánh Xuân nao lehanăn mđup brei Medai kơ Êpul. Blŭ hrăm ti knăm anei, K’iăng khua lăn čar Võ Thị Ánh Xuân mtă kơ Êpul hgŭm mnuih drao ruă dioxin dŭm gưl lŏ dơ̆ng mlih mrâo kơ boh phŭn, hdră ngă bruă, mđĭ lar ai tiê “Hgŭm mguôp – Khăp čiăng – Đua klam – Kyua mnuih djŏ drao ruă dioxin”, mđĭ boh tŭ hdră mă bruă, ngă jăk hĭn hdră đru kčĕ lehanăn iêu mtrŭt djăp ai dưi klei mâo hlăm yang ƀuôn čiăng kriê dlăng, đru kơ phung djŏ drao ruă dioxin hŏng hdră lehanăn knhuang nao djŏ guôp hŏng klei găl đĭ kyar mơ̆ng lăn čar./.

H’Nêč pô mblang