VOV4.Êđê- Aguah 13/12, ti Hà Nội, hlăm jar Klei bi kƀĭn bruă hŏng tač êngao tal 31, mkŏ mjing leh Klei bi kƀĭn bruă hŏng tač êngao kluôm ala tal 20 hŏng hdră tlă anăp leh anăn online, mkŏ hĭng dŭm anôk hlăm ala čar leh anăn ala tač êngao. Klei bi kƀĭn bruă hŏng tač êngao tal 20 jing gưl yuôm bhăn čiăng dŭm alŭ wăl, dŭm dhar bruă, phŭn bruă gưl dlông, dŭm Anôk bruă bi ala Việt Nam ti ala tač êngao leh anăn ƀĭng hgŭm hŏng tač êngao ksiêm dlăng kơ klei tŭ dưi mâo hlăm bruă hŏng tač êngao ti alŭ wăl, ba hdră msir čiăng hyuă kjăp klei bi hgŭm, mđĭ boh tŭ dưn pŏk ngă bruă anei hlăm wưng kơ anăp. Ti anôk bi kƀĭn, Khua phŭn bruă hŏng tač êngao Bùi Thanh Sơn bi mklă: Mơ̆ng klei bi kƀĭn bruă hŏng tač êngao kluôm ala tal 19 thŭn 2018 truh ară anei, boh klei dlông rŏng lăn leh anăn krĭng wăl bi mlih dleh dlan. Hlăm anăn, klei ruă Covid-19 sui giăm 2 thŭn êgao ngă leh êlam kơ djăp mta ra bruă kđi čar, bruă duh mkra- ala ƀuôn mơ̆ng dŭm ala čar leh anăn mjĕ êrô hŏng tač êngao. Ti gŭ klei Đảng gĭt gai, klei gĭt gai jih ai tiê, tŭ dưn mơ̆ng Knŭk kna, klei ngă bruă mơ̆ng jih bruă kđi čar, dŭm alŭ wăl gĭr ktưn hgao klei dleh dlan, lông dlăng hlăm hdră gang mkhư̆ klei ruă tưp, mđĭ lar bruă duh mkra- ala ƀuôn leh anăn ñŭ kma hŏng tač êngao.

Pô mblang: H’Zawut Ƀuôn Yă