VOV4.Êđê- Aguah hruê 6/1, ti anôk bruă knŭk kna, mkŏ mjing leh Klei bi kƀĭn online ksiêm wĭt hdră bruă răng mgang klei êđăp ênang êlan klông thŭn dih lehanăn pŏk ngă bruă klam hlăm thŭn anei. Khua hlăm Phŭn bruă kđi čar, K’iăng khua knŭk kna Phạm Bình Minh, Khua dhar bruă răng mgang klei êđăp ênang êlan klông ala čar gĭt gai klei bi kƀĭn.

Hluê si klei hưn ti anôk bi kƀĭn, thŭn dih, kahan ksiêm êlan klông kluôm ala hmao ƀuh 2 êklăk 800 êbâo klei ngă soh, đŭ bi kmhal giăm 3 êbâo êklai prăk, hrui mă êbeh 248 pŏk hră dưi mgăt êdeh, mă kơ̆ng êbeh 468 boh êdeh êdâo djăp mta. Blŭ hrăm ti knăm anei, K’iăng khua knŭk kna Phạm Bình Minh mñă klă, hŏng bruă ksiêm dlăng kjăp klei ruă Covid 19 lehanăn lŏ wĭt hŏng klei hdĭp aguah tlam mrâo, dŭm hdră bruă êlan klông, dŭ mdiăng hlăm thŭn anei srăng lŏ wĭt msĕ yang đar kyua anăn K’iăng khua knŭk kna mtă kơ dŭm Phŭn, dhar bruă, alŭ wăl brei ksiêm dlăng, ba mdah dŭm hdră bi hrŏ klei truh hlăm êlan klông hŏng hdră tŭ dưn hlăm wưng ti anăp./.

Pô mblang: H’Nêč Êñuôl