VOV4.Êđê- Ti Hà Nội, 8/12, Anôk bruă kahan ksiêm êa ksĭ Việt Nam gĭt gai Klei bi kƀĭn online phung khua kiă kriê kahan ksiêm êa ksĭ dŭm ala čar ti Asi tal 17 hŏng phung khua kiă kriê êpul kahan ksiêm hlăm êa ksĭ/ hluê ngă hdră bhiăn hlăm êa ksĭ ti 20 ala čar, 1 krĭng lăn ala, 1 êpul bruă lu ala čar leh anăn 3 čô pô kăp kriê dlăng. Anei jing klei bi kƀĭn tal êlâo dưi mkŏ mjing hŏng hdră online. Anei jing bruă ngă tŭ dưn, đru mguôp kơ klei mđĭ ktang bruă bi hgŭm plah wah dŭm êpul kahan hluê ngă hdră bhiăn ti krĭng Asi, kyua hdră kñăm leh anăn klei tŭ dưn mbĭt kơ bruă rơ̆ng klei êđăp ênang, hơĭt kjăp leh anăn mđĭ kyar krĭng êa ksĭ ti krĭng wăl leh anăn dlông rŏng lăn. Klei bi kƀĭn mkŏ mjing hŏng 2 klei bi trông hlăm ai êwa bi hgŭm, pŏk mlar, đaŏ knang leh anăn kpă mngač. Anei jing klei găl čiăng êpul kahan ksiêm hlăm êa ksĭ dŭm ala čar tui hriăm, bi mklă leh anăn mđĭ dŭm klei bi hgŭm sĭt nik hĭn čiăng hrăm mbĭt msir mgaih dŭm bruă hluê ngă hdră bhiăn hlăm êa ksĭ. Bruă hrăm mbĭt msir mgaih dŭm klei arưp aram kơ klei êđăp ênang, klei lông dlăng mrâo mâo hlăm êa ksĭ brei mđĭ ktang klei bi hgŭm plah wah dŭm ala čar kơ kleo rơ̆ng êđăp ênang hlăm êa ksĭ.

Pô mblang: H’Zawut Ƀuôn Yă