VOV4.Êđê - Knơ̆ng bruă Dhar kreh lehanăn mjuăt bi hriăm mơ̆ng Anôk bruă kƀĭn ala mrâo bi hgŭm hŏng Phŭn bruă Dhar kreh, mjuăt ktang asei mlei lehanăn Hiu čhưn ênguê čar Nghệ An mkŏ mjing leh Klei bi kƀĭn trông “Bruă hiu čhưn ênguê Việt Nam – kơrŭ wĭt lehanăn đĭ kyar”. Blŭ hrăm gĭt gai ti anôk bi kƀĭn trông, K’iăng khua anôk bruă kƀĭn ala Trần Thanh Mẫn mñă klă, mđĭ kyar anôk bruă hiu čhưn ênguê jing sa hlăm dŭm hdră êlan mtrŭn prŏng mơ̆ng Đảng, Knŭk kna drei. Klei ruă Covid 19 sui truh 2 thŭn hmăi leh prŏng truh kơ hdră mđĭ kyar bruă duh mkra – ala ƀuôn mơ̆ng lăn čar, hlăm anăn mâo anôk bruă hiu čhưn ênguê.

Kyua hmăi mơ̆ng klei ruă tưp, truh kơ ară anei, ala čar drei ka drông phung tuê hiu čhưn ênguê ala tač êngao, phung tue hiu čhưn hlăm ala čar ăt hrŏ êbeh 42% mkă hŏng wưng anei thŭn êlâo, ênoh hrui mâo mơ̆ng phung tue hiu čhưn ênguê hrŏ giăm 50%. Klei bi kƀĭn trông lŏ dơ̆ng bi mklă klei bi mjĕ mơ̆ng Hdră lŏ krŭ wĭt bruă duh mkra – ala ƀuôn kluôm mơ̆ng lăn čar hŏng dŭm mta bruă, hdră kčah, hdră lŏ krŭ wĭt, mđĭ kyar bruă hiu čhưn ênguê, hưn mdah dŭm hdră msir, hdră mtrŭn boh nik dŭm hdră rơ̆ng gang mkhư̆ kjăp klei ruă tưp čiăng pŏk ƀăng hŏng klei êđăp ênang, mđĭ ai bi ktưn mơ̆ng bruă hiu čhưn ênguê Việt Nam hlăm boh klei mrâo./.

H’Nêč pô mblang