VOV4.Êđê- Ti Anôk bruă kƀĭn ala, Khua anôk bruă kƀĭn ala Vương Đình Huệ lehanăn Khua bruă kƀĭn ala lăn čar Lao Xay-xổm-phon Phôm-vi-hản hrăm mbĭt gĭt gai leh Klei bi kƀĭn trông klei thâo ngă bruă plah wah Anôk bruă kƀĭn ala Việt Nam lehanăn Anôk bruă kƀĭn ala Lao. Klei kƀĭn trông jing hdră ngă bruă klă klơ̆ng čiăng bi sĭt hdră bi hgŭm bruă, bi trông klei thâo plah wah dua anôk bruă kƀĭn ala hlăm bruă čih mkra hdră bhiăn; ksiêm dlăng, bi mklă dŭm bruă yuôm bhăn mơ̆ng lăn čar. Hlăm wưng păn bruă êgao, anôk bruă kƀĭn ala dua ala čar mkŏ mjing leh 8 Klei bi kƀĭn trông thơ̆ng kơ bruă hlăm anăn mâo 4 Klei bi kƀĭn trông mâo Khua anôk bruă kƀĭn ala dua ala čar hrăm mbĭt gĭt gai. Khua anôk bruă kƀĭn ala Vương Đình Huệ lač, mơ̆ng dŭm klei bi trông, bruă kƀĭn ala dua ala čar kah mbha leh klei thâo yuôm bhăn hlăm hdră ngă bruă. Lŏ čuê klei tŭ jing anei, Klei kƀĭn bi trông leh klei thâo ngă bruă plah wah anôk bruă kƀĭn ala Việt Nam lehanăn anôk bruă kƀĭn ala Lao mđing bi trông kơ Hdră êmuh lehanăn wĭt lač klei êmuh ti Klei bi kƀĭn mơ̆ng Anôk bruă kƀĭn ala Việt Nam lehanăn klei thâo mơ̆ng anôk bruă kƀĭn ala Việt Nam hlăm bruă ksiêm dlăng, bi mklă dŭm hdră bruă yuôm bhăn mơ̆ng ala čar mâo boh tŭ yuôm hŏng hdră mđĭ kyar bruă duh mkra – ala ƀuôn mơ̆ng lăn čar./.

Pô mblang: H’Nêč Êñuôl