VOV4.Êđê- Mơ̆ng akŏ mlan 11/2021 truh ară anei, čar Gia Lai ƀuh leh dŭm anôk mâo klei ruă Covid-19 ti dŭm ƀuôn mnuih djuê ƀia wti ƀuôn prŏng Pleiku leh anăn kdriêk Đăk Đoa. Klei bi mtưp dưi bi mklă djŏ tuôm  kơ klei bhiăn hdĭp mda êpul êya mơ̆ng mnuih ƀuôn sang, boh nik klei mkŏ mjing knăm dơr djiê.

Hlăm dŭm hrue anei, să Hà Bầu, kdriêk Đăk Đoa jing leh anôk phŭn mrâo klei ruă tưp ti Gialai. Hlăm êbeh sa hrue kăm êgao, alŭ wăl mâo leh giăm 200 čô mnuih mâo klei ruă tưp ti 6 boh ƀuôn mnuih djuê ƀiă. Hlăm anăn, hjăn ƀuôn Nŭ mâo 88 čô mnuih. Lu jing F0 anei nao hlăm klei huă ƀơ̆ng sa klei djiê brŭ hlăk hrue 10 lehanăn 11/11. Aduôn Dương Thị Kim Quy, k’iăng khua knơ̆ng bruă sang čư̆ êa să Hà Bầu, kdriêk Đăk Đoa brei thâo:

“Êpul kiă kriê jao leh kơ êpul ngă bruă mdrơ̆ng hŏng Covid 19 hlăm ƀuôn sang, kăm ghă klei dôk bi ngi lu mnuih, răng hŏng mnuih mơ̆ng ƀuôn mkăn hriê, dah mâo bi čih anăn. Sitôhmô, dah mnuih djuê lar thâo hlăk hlăm yan mâo klei ruă tưp, snăn nao knŏng čuh brui mngưi, leh anăn wĭt yơh. Ƀiădah hŏng phung ƀuôn sang pô lĕ mdê, lŏ dôk bi mă kngan, bi yăl dliê hdơ̆ng găp, ƀơ̆ng sa mbah, mnăm sa kčŏk kpiê. Kyuanăn yơh, jing dleh êdi hlăm bruă mdrơ̆ng hŏng klei ruă tưp”.

Hluê si klei bhiăn, jih ƀuôn sang mguôp mnơ̆ng huă ƀơ̆ng hŏng gŏ sang mkŏ mjing klei dơr djiê hlăm 3 hruê

                 Bi ti ƀuôn prŏng Pleiku, ară anei mâo 3 boh ƀuôn mnuih Jrai tuôm hŏng klei kwang dar kăm mkhư̆ leh kyua ƀuh dŭm êtuh čô mnuih mtam djŏ kman klei ruă tưp Covid 19, ăt kbiă hriê mơ̆ng klei čang djiê. Rčom Thŏt, khua bruă Đảng ƀuôn Ô̆p, ƀuôn hgŭm Hoa Lư, ƀuôn prŏng Pleiku lač, klei bi čang ênuh duh mgei klei djiê ƀrŭ hlăm phung ƀuôn sang yơh ba klei ruă tưp lêč lar ngă kơ ƀuôn mâo truh 77 čô mnuih tưp djŏ klei ruă:

“Hlăm ƀuôn sang mâo mnuih djiê, snăn jih jang bi nao čang ênuh duh mgei klei djiê brŭ, mnuih mâo kpiê čeh ba kpiê čeh, mâo ŭn ba ŭn, mâo mnŭ ba mnŭ đru bi juh gŏ sang mnuih mâo klei djiê ƀrŭ, jing tui hlue hŏng hnơ̆ng dưi thâo mâo mơ̆ng găp ênuê djuê êpul. Lu jing bi djă ba mnŭ, ŭn dah prŏng êdi, dôk mbĭt, mnăm mbĭt. Mkŏ mjing klei čang ênuh mơ̆ng 2 – 3 hrue, truh hrue tal 4 kơh jih, snăn ngă hmăi amâo mâo jăk kơ klei suaih pral, kơ ngăn dŏ. Ară anei klei bhiăn anăn ăt adôk djă pioh, ka dưi lui ôh”.

Lu ƀuôn sang mnuih djuê ƀiă ti kdriêk Đăk Đoa, Gia Lai kwang dar čiăng hiu duah, bi ksiêk phung F0,F1 hlăm êpul êya.

Ară anei ti Gialai, mâo hlăm brô 1 êbâo boh ƀuôn mnuih djuê ƀiă hlăm 17 boh kdriêk, wăl krah, ƀuôn prŏng. Hŏng dŭm djuê ana ti Lăn Dap Kngư, klei bi mguôp hlăm yang ƀuôn ăt adôk djă pioh hluê knhuah đưm dơ̆ng mơ̆ng klei hdĭp mda aguah tlam mlam hrue, hlăm klei duh ƀơ̆ng, lehanăn klei hdĭp dhar kreh. Ƀiădah hŏng yan dôk găn klei ruă tưp msĕ snei dôk dleh dưi ksiêm dlăng, anei lŏ jing hĕ sa klei dleh kpăk êdi hlăm bruă mdrơ̆ng hŏng klei ruă tưp mơ̆ng čar.

        Lê Văn Quang Khua kiă kriê ƀuôn hgŭm Hoa Lư, ƀuôn prŏng Pleiku lač, čiăng mghaih msir klei anei, jing brei mâo klei bi mguôp jih ai tiê mơ̆ng bruă kđi čar, boh nik dưn yua jih k’hưm klei găl mơ̆ng phung khua mduôn, đru bi hâo hưn mtô mblang čiăng kơ jih jang phung ƀuôn sang hmư̆, bi hlue gưt, lehanăn sa ai mbĭt hlăm bruă mdrơ̆ng hŏng klei ruă tưp:

“Êjai hlăm wưng dôk hlăm klei kăm mkhư̆, ƀuôn Ô̆p mâo sa klei djiê brŭ. Hmei tiŏ nao leh jih êpul ngă bruă kđi čar hâo hưn mtă mtăn kơ găp djuê mâo mnuih djiê, amâo lŏ mkŏ mjing ôh klei čang ênuh ti sang. Leh găp djuê tŭ ư hŏng klei hâo hưn, snăn mprăp nao klei ƀăng, ba mnuih djiê hlŏng nao dơr mtam, amâo lŏ dôk bi ngi lu mnuih ôh, ñĕ kơ klei mkŏ mjing čang ênuh lu mnuih hlăm ƀuôn sang”./.

Pô mblang: Y-Khem Niê