VOV4.Êđê- Aguah anei, hruê 25/11, ti anôk bruă knŭk kna, K’iăng khua knŭk kna Lê Văn Thành gĭt gai leh Klei kƀĭn bi mklă hdră čuăl mkă krĭng Dap mnai êa krông Cửu Long wưng thŭn 2021 – 2030, hnơ̆ng trah dlăng truh ti thŭn 2050. Hdră čuăl mkă krĭng Dap mnai êa krông Cửu Long wưng thŭn 2021 – 2030, hnơ̆ng trah dlăng truh ti thŭn 2050 jing hdră čuăl mkă mâo boh tŭ yuôm bhăn hlăm hdră êlan mđĭ kyar kluôm mơ̆ng krĭng lehanăn 13 čar hlăm krĭng. Bruă čih mkra hdră čuăl mkă krĭng Dap mnai êa krông Cửu Long kñăm bi mklă hdră êlan mđĭ kyar, mjing wăl anôk lehanăn kah mbha mnuih mă bruă kơ hdră mđĭ kyar bruă duh mkra ala ƀuôn, bruă lĭng kahan, răng mgang klei êđăp ênang, răng mgang wăl hdĭp mda mlir dhar bruă, mlir krĭng lehanăn mlir čar hluê hdră mđĭ lar klei găl mâo mơ̆ng krĭng, iêu mtrŭt lehanăn ba yua tŭ dưn djăp ai dưi, klei mâo, mnuih mă bruă kñăm mđĭ kyar krĭng Dap mnai êa krông Cửu Long truh ti thŭn 2050 jing Krĭng mâo hnơ̆ng đĭ kyar pral mkă hŏng kluôm ala hluê si klei ba mdah leh ti Hdră mtrŭn mrô 120 mơ̆ng Knŭk kna./.

Pô mblang: H’Nêč Êñuôl