VOV4.Êđê- Aguah mbruê 9/12, ti Hà Nội, adŭ bruă mnia mblei leh anăn tuh tia Việt Nam bi mguôp leh hŏng êpul hgŭm dŭm knơ̆ng bruă kyua klei đĭ kyar kjăp Việt Nam mkŏ mjing knăm hưn mdah knơ̆ng bruă kjăp ti Việt Nam. K’iăng Khua knŭk kna Vũ Đức Đam, khua gĭt gai êpul hgŭm ala čar kơ klei đĭ kyar kjăp leh anăn mđĭ klei thâo bi ktưn, khua gĭt gai dŭm phŭn, dhar bruă gưl dlông, khua gĭt gai dŭm êpul êya tar rŏng lăn ti Việt Nam nao hgŭm. Hŏng akŏ “mđing truh kơ wưng 10 thŭn mđĭ kyar jăk siam hĭn: amâo lui sa čô kơ tluôm”, phung bi ala kñăm bi trông kơ dŭm hdră êlan ngă bruă, hdră mđĭ kyar, hdră ala čar kñăm kơ klei đĭ kyar mtah wưng thŭn 2021 – 2030, bi tŭ jing bruă klam mdua đĭ kyar hmar leh anăn kjăp hlăm wưng 10 mrâo. Blŭ hlăm klei kƀĭn anăn, k’iăng Khua knŭk kna Vũ Đức Đam hmăng hmưi, dŭm knơ̆ng bruă srăng hrăm mbĭt ngă dŭm klei mlih, wăt kơ klei anăn jih điêt kyua klei đĭ kyar kjăp. K’iăng Khua knŭk kna lŏ mñă klă: hlăm wưng klei ruă tưp Covid-19, ala čar Việt Nam ăt dưi brei ƀuh, grăp čô mnuih ƀuôn sang, grăp knơ̆ng bruă mâo klei mkiêt mkriêm, srăng jing ai ktang đru bi djŏ guôp hlăm wưng mgi dih.

Pô mblang: Y-Ƀel Êban