VOV4.Êđê - Hruê anei 4/1, ti sang bruă kƀĭn ala, tal êlâo hĭn bruă kƀĭn ala ngă klei kƀĭn êngao hdră, ksiêm dlăng, bi klă 4 mta phŭn yuôm bhăn, mjêč kơ bruă krŭ wĭt leh anăn mđĭ kyar bruă duh mkra – ala ƀuôn. Anei jing klei kƀin ka tuôm mâo, bi êdah klei ngă bruă mlih mrâo hrăm mbĭt hŏng knŭk kna mơ̆ng bruă kƀĭn ala gưl 15. Bruă kƀĭn ala srăng ksiêm dlăng, bi klă 4 mta phŭn yuôm mjêč, hlăm anăn năng mđing hĭn, klei čih mkra hdră mtrŭn ngăn prăk đru kơ bruă krŭ wĭt leh anăn mđĭ kyar bruă duh mkra ala ƀuôn. Hdră mtrŭn anei mâo boh tŭ dưn yuôm bhăn leh anăn mjêč, djŏ hŏng boh sĭt. Phung bi ala leh anăn mnuih ƀuôn sang dôk guôn hdră ngăn prăk mâo bruă kƀĭn ala bi klă hlăm klei kƀĭn êngao hdră srăng jing dŭm hdră êlan dưi mkŏ mjing leh anăn dưi ngă hmar, mâo hruê mmông ngă bruă djŏ guôp čiăng krŭ wĭt leh anăn mđĭ kyar bruă duh mkra, rơ̆ng klei mtăp mđơr dŭm anôk bruă duh mkra, ênŭm hnơng čoh čuăn ti anăn leh anăn sui hruê nao mbĭt hŏng hdră êlan krŭ wĭt bruă duh mkra wưng thŭn 2021 - 2025.

Y - Ƀel pô mblang