VOV4.Êđê- Aguah anei 9/12 ti adŭ bruă bi kƀĭn Diên Hồng hlăm sang bruă kƀĭn ala, ti gŭ klei gĭt gai mơ̆ng khua gĭt gai Đảng Nguyễn Phú Trọng, phŭn bruă kđi čar, êpul khua bruă Đảng mkŏ mjing leh klei kƀĭn trông kluôm ala kơ bruă hyuă kjăp, tui ngă klei bi klă leh anăn klei bhiăn mơ̆ng gưl dlông hlăm bruă mkŏ mjing klei ƀuăh mkra hlăm Đảng. Mta kñăm hlăm klei kƀĭn trông anei jing lŏ mtrŭt mđĭ bruă ksiêm duah, hyuă kjăp klei bi klă mrô 21 kơ klei mđĭ bruă mkŏ mjing, ƀuah mkă hlăm Đảng leh anăn wăt kơ bruă kđi čar, ktang phĭt gang mkhư̆, msưh kdŭn, ƀuah mkra phung knuă druh, đảng viên mâo klei mĭn, knhuah hdĭp, klei hdĭp mâo jăk, čŏng mĭn, čŏng ngă leh anăn klei bhiăn mrô 37 kơ dŭm bruă đảng viên amâo dưi ngă mơ̆ng êpul khua bruă Đảng gưl dlông hlăm kluôm Đảng leh anăn bruă kđi čar mơ̆ng gưl dlông truh kơ nah gŭ. Hlăm klei kƀĭn trông anăn, khua gĭt gai Đảng Nguyễn Phú Trọng mnă klă, hŏng ai tiê gĭr ktưn bi kdơ̆ng, amâo lui kơ phung mĭn mă kơ pô, gang mkhư̆ klei ƀơ̆ng ngăn leh anăn klei amâo jăk, gang mkhư̆, msưh kdŭn, ƀuah mkra ktang phĭt klei toh hroh hlăm klei mĭn bruă kđi čar, knhuah hdĭp, klei hdĭp.

Pô mblang: Y-Ƀel Êban