1. Lu hdră mtrŭn yuôm bhăn krah wưng păn bruă Klei bi kƀĭn tal XIII mơ̆ng Đảng

Ti Klei bi kƀĭn tal 7, mbĭt hŏng bruă tĭng dlăng kluôm dŭm boh tŭ dưi mâo, Anôk kriê dlăng Gưl dlông mă leh 5 klei hriăm, tă 5 bruă klam phŭn hlăm mkrah gưl mơ̆ng wưng păn bruă tal XIII adôk; mplĕ hră đăo knang hŏng phung Khua hlăm Phŭn bruă kđi čar lehanăn Anôk dlăng bruă Đảng. Ti anôk bi kƀĭn tal 8, Anôk kriê dlăng gưl dlông ba mdah leh 4 Hdră mtrŭn yuôm bhăn, ksiêm dlăng brei klei blŭ kơ hdră čuăl mkă Anôk kriê dlăng bruă Đảng gưl dlông wưng thŭn 2026-2031. Dua Klei bi kƀĭn gưl dlông yuôm bhăn hlăm thŭn kñăm hluê ngă Hdră mtrŭm Klei bi kƀĭn tal XIII mñă klă leh klei kiă kriê, gĭt gai kjăp mơ̆ng Anôk kriê dlăng gưl dlông, Phŭn bruă kđi čar, dŭm gưl bruă Đảng hlăm klei hluê ngă Hdră mtrŭn anei, pral msir mghaih tŭ dưn dŭm bruă mrâo bluh đĭ čiăng kơ jih anôk bruă kđi čar bi leh tŭ dưn dŭm mta kñăm mđĭ kyar mâo Klei bi kƀĭn tal XIII mơ̆ng Đảng kčah mtrŭn./.

2. Hdră hŏng tač êngao mñă klă leh k’hưm mơ̆ng Việt Nam

Dŭm hdră hiu čhưn gưl knŭk kna truh ti Việt Nam mŏng Khua gĭt gai Đảng, Khua lăn čar China Tập Cận Bình, Khua mil čhil Mi Joe Biden lehanăn lu phung khua dŭm ala čar mkăn; Phung khua kiă kriê Đảng, Knŭk kna Việt Nam ăt mâo lẹh gưl hriê čhưn klă klơ̆ng ti lu ala čar mjing gru kruăk yuôm bhăn hlăm hdră hŏng tač êngao mŏng Việt Nam. Thŭn 2023, Việt Nam lehanăn China tŭ ư mkŏ mkra “Êpul êya êdei anăp Việt Nam – China”, mkra mđĭ jing “Klei bi mjĕ ƀĭng hgŭm phŭn kluôm dhuôm” hŏng Mi lehanăn Japon, đĭ jing klei bi mjĕ ƀĭng hgŭm kluôm, ƀĭng hgŭm phŭn lehanăn kluôm hŏng 30 ala čar, hlăm anăn mâo 5 čô khua hlăm Êpul hgŭm răng mgang klei êđăp ênang lu ala čar.

Hdruôm hră “Mkŏ mkra lehanăn mđĭ kyar hdrtă hŏng tač êngao, hdră hŏng tač êngao Việt Nam kluôm dhuôm, mrâo mrang, jiă knhuah dhar kreh “Ana kram Việt Nam” mơ̆ng Khua gĭt gai Đảng Nguyễn Phú Trọng hưn mdah, jing tur knơ̆ng yuôm bhăn, bi êdah klei mĭn sa anăn mơ̆ng Đảng hŏng hdră tač êngao Việt Nam. Klei tŭ jing mơ̆ng hdră hŏng tač êngao thŭn 2023 bi sĭt leh hdră hŏng tač êngao mơ̆ng Klei bi kƀĭn tal XIII mơ̆ng Đảng, đru mjing lehanăn krơ̆ng kjăp wăl anôk êđăp ênang, h’ĭt kjăp lehanăn đĭ kyar, mđĭ k’hưm mơ̆ng ala čar./.

3. Bi leh klei bhiăn ksiêm dlăng klei dưi, mtrŭt mđĭ hdră bi kdơ̆ng hŏng klei ƀơ̆ng ngăn, klei ngă amâo djŏ.

Thŭn 2023, Phŭn bruă kđi čar ba mdah leh lu hdră mtrŭn ksiêm dlăng klei dưi, bi kdơ̆ng hŏng klei ƀơ̆ng ngăn, klei ngă amâo djŏ hlăm hdră knuă druh, ksiêm dlăng, kčŭt hưn, phat mkra; ktuê ksiêm, hluê ngă klei ƀuah mkra Đảng lehanăn hdră ksiêm dlăng, tĭng dlăng. Dŭm klei kčah mtrŭn anei đru mđĭ hĭn bruă ksiêm dlăng klei dưi mơ̆ng phung knuă druh, đảng viên, boh nik mnuih djă akŏ. Hdruôm hră “Kjap ktang, bi kdơ̆ng hŏng klei ƀơ̆ng ngăn, klei ngă amâo djŏ, đru mkŏ mkra Đảng, Knŭk kna drei ƀrư̆ hruê ƀrư̆ doh mngač, kjăp ktang” mơ̆ng Khua gĭt gai Đảng Nguyễn Phú Trọng hưn mdah, đru bi mklă hĭn klei mĭn mơ̆ng Đảng drei kơ hdră bi kdơ̆ng hŏng klei ƀơ̆ng ngăn, klei ngă amâo djŏ lehanăn mkŏ mkra Đảng.

Bruă lŏ dơ̆ng pŏk mlar hdră ksiêm dlăng wưng tal 2 boh klei djŏ tuôm kơ Anôk bruă Việt Á, boh klei mâo ti Knơ̆ng bruă kluôm, Phŭn bruă hŏng tač êngao, dŭm boh klei mâo ti Êpul group FLC, Tân Hoàng Minh, Wăl anôk AIC; klei mâo ti Knơ̆ng prăk SCB, Êpul group Vạn Thịnh Phát, Anôk bruă An Đông… msir mghaih lu phung soh jing knuă druh gưl dlông, dôk păn bruă lehanăn leh mdei bruă hluê ai tiê “Amâo mâo krĭng kăm, amâo lui hlei pô ôh” đru bi kjăp klei đăo knang mơ̆ng phung knuă druh, đảng viên lehanăn jih jang mnuih hŏng Đảng, Knŭk kna./.

4. Bruă duh mkra Việt Nam đĭ kyar hơĭt kjăp hlăm sa rŏng lăn amâo mâo hơĭt

Thŭn 2023, dŭm mta kñăm prŏng mơ̆ng bruă duh mkra dưi mâo kluôm, bruă duh mkra hnơ̆ng prŏng mâo klei hơĭt, đăo knăl klei đĭ kyar GDP mâo êbeh 5%, dŭm klei bi kna prŏng dưi rơ̆ng kjăp. Lu hdră êlan ngăn prăk hnơ̆ng lu hĭn mơ̆ng êlâo truh kơ ară anei dưi hluê ngă hrăm mbĭt, ktang phĭt kñăm đru kơ klei krŭ wĭt, mđĭ kyar bruă duh mkra ala ƀuôn, bi kluôm dŭm hdră êlan čiăng bi hơĭt klei duh bi liê mnia mblei, bi hơĭt ênoh ênil, ênoh mnơ̆ng dhơ̆ng leh năn ruh mgaih klei dleh dlan ngăn prăk, lăn ala, bruă mkŏ mkra, čhĭ mnia sang lăn. Khădah ka dưi mâo hŏng mta kñăm bi êdah leh, ƀiădah anei jing klei gĭr năng čih yap hlăm wưng bruă duh mkra Việt Nam tŭ lu klei hmăi mơ̆ng lu “Angĭn mklăk”.

5. Klei klưn hĭn bruă mkra mkŏ mkra êlan klông – mkŏ mjing tur kơ klei đĭ kyar

Thŭn 2023, Việt Nam mâo leh klei gĭr ruh mgaih dŭm klei dleh dlan kơ klei kiă kriê, hdră êlan, mkŏ mjing klei kdlưn hĭn hlăm dŭm mta bruă mkŏ mkra msĕ si sang ga leh anăñ tač êdeh phiơr Long Thành, bi leh 730km êlan dơ̆ng pral, mđĭ boh taih êlan dơ̆ng pral ti ala čar drei jing 1.900km, ară anei dôk rŭ mjing giăm 1.700km êlan dơ̆ng pral Dưr Dhŭng, Ngŏ Yŭ. Mbĭt hŏng anăn jing lu hdră rŭ mjing êlan klông mkăn hŏng kluôm ênoh duh bi liê êbeh 94.000 êklai prăk, đru mgaih msir dŭm klei kpăk đuôm hlăm êlan klông, ƀrư̆ ƀrư̆ bi kluôm bruă mkŏ krĭng, mkŏ mjing boh kdrŭt mđĭ kyar bruă duh mkra ala ƀuôn. Hŏng klei gĭt gai ktang phĭt mơ̆ng knŭk kna, dŭm Phŭn, dhar bruă, dŭm alŭ wăl mâo klei mmlih prŏng hlăm klei mĭn, mâo klei ngă bruă hŏng klei mbruă, bi hrŏ klei ngă hră mơar knŭk kna leh anăn bruă ti krah, mđĭ hĭn bruă klam, rơ̆ng klei ngă bruă mơ̆ng dŭm bruă mkŏ mkra, hdră mkăp.

6. 80 thŭn klei hriăm kơ dhar kreh Việt Nam

Klei hriăm dhar kreh Việt Nam, hŏng 3 hdră bhiăn bi klă knhuah gru dhar kreh cách mạng Việt Nam, djuê ana, klei kreh knhâo leh anăn mnuih ƀuôn sang, găn 80 thŭn mơ̆ng hruê čih mkra, ăt dưi bi lar boh tŭ kmeh gơ̆ng mơ̆ng sa hră mơar hdră bhiăn, boh tŭ klei hlăk mblang leh anăn knhuah ênuk gưl, lŏ dơ̆ng mtrang mngač kơ bruă mkŏ mjing leh anăn răng mgang lăn čar. Dŭm mta bruă bi hdơr 80 thŭn čih mkra Klei hriăm kơ dhar kreh Việt Nam mâo leh lu klei hâo hưn tŭ dưn, kñăm bi lar klei yuôm bhăn hlăm hƀuê ênuk, klei yuôm bhăn mơ̆ng klei hiăm, čiăng kơ dhar kreh jing tur knơ̆ng ai tiê, ai ktang hlăm lăm, boh kdrŭt mđĭ kyar lăn čar leh anăn răng mgang lăn čar hluê si hdră mtrŭn Klei kƀĭn kluôm tal 13 mơ̆ng Đảng.

7. Lu klei pui ƀơ̆ng ngă truh klei jŭ jhat kjham

Giăm 2000 klei pui ƀơ̆ng, giăm 150 čô djiê, ngă truh klei hmăi kjham kơ ngăn dŏ hlăm thŭn 2023, hlăm anăn kjham hĭn jing klei pui ƀơ̆ng sang lu tlal hruê 12/9 ti kdriêk čar Thanh Xuân, ƀuôn prŏng Hà Nội, ngă kơ 56 čô djiê leh anăn 37 čô êka. Ênoh anei lŏ lač kơ boh sĭt năng hưn brei răng hlăm bruă gang mkhư̆, truih mdjiê klei pui ƀơ̆ng, hlăm anăn mâo boh klei ngă êdu êdăk hlăm bruă kriê dlăng, brei mâo lu bruă mkŏ mkra soh hŏng hdră bhiăn, amâo mâo rơ̆ng klei êđăp ênang hlăm bruă gang mkhư̆, truih mdjiê pui ƀơ̆ng, bruă ksiem dlăng ka ktang phĭt ngă truh mâo nanao klei ngă soh, klei thâo săng răng mgang klei êđăp ênang, gang mkhư̆ klei pui ƀơ̆ng mơ̆ng mnuih ƀuôn sang ka mâo ênŭm…čiăng êdi dŭm klei mkra mlih, ƀuah mkra ktang phĭt.

8. Klei kƀah êa drao, kdrăp mdrao mgŭn ka dưi msir mgaih bi jih

Wăt tơdah bruă kƀĭn ala, knŭk kna leh anăn Phŭn bruă mdrao mgŭn mtrŭn lu hră mơar kñăm “ruh mgaih klei dleh dlan” kơ bruă mdrao mgŭn, ƀiădah klei kƀah êa drao, kdrăp mnơ̆ng mdrao mgŭn ti sang êa drao mơ̆ng gưl dlông truh kơ alŭ wăl ăt ka dưi msir mgaih bi jih. Mta phŭn jing kyua hmăi mơ̆ng klei ruă Covid-19, kyua kdrăp hră mơar hdră bhiăn adôk êdu kƀah, bruă ngă hră mơar akâo blei, boh nik kƀĭn sa mta adôk gun kpăk, mâo klei huĭ ngă soh hlăm lu mnuih, anôk bruă, alŭ wăl… Kơ sui brei mâo dŭm hdră msir ktang hĭn čiăng msir mgaih bi jih klei anei.

9. Bi mklă wưng hlue ngă hdră mkra mlih prăk mlan

Bruă mkra mlih kluôm hdră êlan prăk mlan mơ̆ng bruă mă, rơ̆ng amâo ƀiă hĭn ôh prăk mlan dưi dưn srăng dưi hlue ngă mơ̆ng hruê 01/07/2024.  Hdră kñăm mrô sa mơ̆ng hdră êlan anei jing čiăng kơ prăk mlan klă sĭt jing prăk hrui wĭt rơ̆ng kơ klei hdĭp mnuih mă bruă leh anăn gŏ sang; tla prăk mlan djŏ čiăng bi liê kơ klei mđĭ kyar mnuih mă bruă, mjing boh kdrŭt mđĭ hnơ̆ng mkra mjing leh anăn klei tŭ dưn mă bruă, đru yuôm bhăn hlue ngă hnơ̆ng đĭ kyar leh anăn mtăp mđơr ala ƀuôn, rơ̆ng êđăp ênang kđi čar - ala ƀuôn, mđĭ hnơ̆ng jăk đĭ kyar leh anăn mđĭ kyar kjăp.

10. Hơĭt dŭm klei hriăm bi lông hriăm ruê̆ gưl tlâo mơ̆ng thŭn 2025

Klei bi lông hriăm ruĕ gưl tlâo mơ̆ng thŭn 2025 srăng dưi mkŏ mjing hŏng 4 klei bi lông jing Toán, Ngữ văn leh anăn 2 mta klei hriăm hlăm dŭm klei hriăm adŭ 12.

Hdră msir anei bi hrŏ klei ktrŏ bi lông leh anăn păn kjăp ai tiê mlih mrâo mơ̆ng hdră mtô bi hriăm gưl tlâo, ksiêm dlăng klă klei thâo, hdră hriăm hră mơ̆ng hđeh sang hră hŏng klei sĭt, đru kơ phung hđeh mđĭ lar klei thâo djŏ guôp hŏng hdră tă bruă mă ti gưl tlâo. Dưi hlue ngă mơ̆ng thŭn 2025, hdră msir anei mâo klei tŭ ư mơ̆ng hđeh sang hră, amĭ ama leh anăn nai mtô.