VOV4.Êđê -  Hluê si Adŭ bruă Anôk bruă gĭt gai ala čar gang mkhư̆ klei yan adiê ngă, yap truh 5 mmông tlam 3/4, adiê hjan ti kwar Krah ngă kơ 2 čô mnuih djiê, 1 čô mnuih luič ka thâo ƀuh leh anăn 5 čô êka. Klă klơ̆ng, adiê hjan ngă klưh 2 boh sang, 50 sang kpŏk čuôr, 262 hô̆ mran kngăm; hlăm brô 2 êbâo 600 anôk rông kan jhat rai; êbeh 88 êbâo ha mdiê leh anăn hlăm brô 17 êbâo ha djam tam êngăp hlăm êa. Msir mgaih boh jhat yan adiê ngă, dŭm alŭ wăl bi hrŏ êa êngăp, ti anôk thu êa hrui mă anôk anăn, truh hruê 3/4, dŭm čar Quảng Ngãi, Bình Định, leh anăn Phú Yên hrui mă leh êbeh 23 êbâo ha mdiê, mâo kdjŏng mă 171 hô̆ mran. Adŭ bruă Anôk bruă gĭt gai ala čar gang mkhư̆ klei yan adiê ngă mtă kơ dŭm alŭ wăl lŏ dơ̆ng mjêč msir mgaih klei luic liê, đru kơ mnuih ƀuôn sang mnơ̆ng ƀơ̆ng huă čiăng amâo mâo ôh ti gŏ êsei kƀah mnơ̆ng ƀơ̆ng huă. Ba nao êpul đru kơ mnuih ƀuôn sang bi doh wăl hdĭp mda, mkra mđĭ sang dôk kpŏk čuôr, êngăp êa, hnưm hơĭt klei hdĭp mda mnuih ƀuôn sang.

H’Zawut pô mblang