VOV4.Êđê - Hrue mbrue (7/6), Anôk bruă kahan ksiêm halwm phŭn bruă kahan ksiêm mâo leh klei bi klă mă kơ̆ng êjai Khua phŭn bruă Mdrao mgŭn Nguyễn Thanh Long, Khua knơ̆ng bruă sang čư̆ êa ƀuôn prŏng Hà Nội Chu Ngọc Anh, lehanăn K’iăng khua Phŭn bruă kreh knhâo Phạm Công Tạc čiăng ksiêm êmuh kơ djăp mta klei soh djŏ tuôm hŏng knơ̆ng bruă Việt Á duah mđĭ ênoh čhĭ kit mka dlăng kman Covid 19. Êlâo anăn, aguah hrue mbrue (7/6), Bruă kƀĭn ala bi klă leh Hdra mtrŭn mơ̆ng bruă kƀĭn ala kơ bruă lăm lui jing pô bi ala Bruă kƀĭn ala gưl 15 hŏng Nguyễn Thanh Long, Êpul bi ala bruă kƀĭn ala čar Vĩnh Long, lehanăn bi klă hdră mtrŭn mơ̆ng bruă kƀĭn ala akâo kơ khua knŭk kna kơ bruă mdlưh bruă jing khua phŭn bruă mdrao mgŭn wưng păn bruă 2021 – 2026. Êpul Gơ̆ng bruă ƀuôn sang ƀuôn prŏng Hà Nội gưl 16 ăt bi mklă bruă mdlưh klei jing khua Knơ̆ng bruă sang čư̆ êa ƀuôn prŏng Hà Nội gưl 16, wưng păn bruă 2021 – 2026 hŏng Chu Ngọc Anh. Ti anăp boh klei anei, lu phung bi ala bruă kƀĭn ala bi lač, anei jing klei lŏ bi êñơ̆k ai tiê knhuah hdĭp hlăm phung khua prŏng, lehanăn lŏ sa blư̆ dơ̆ng brei ƀuh bruă bi kdơ̆ng hŏng klei ƀơ̆ng ngăn, klei ngă amâo mâo djŏ “Amâo lŏ mâo anôk kăm ghă ôh, amâo mâo pô dôk kơ êngao ôh, khădah hlei pô anăn jing dưn”./.

Y – Khem pô mblang