Ti krah yan bhang Lăn Dap Kngư, să Rơ Kơi, kdriêk Sa Thầy, čar Kon Tom ăt dôk mtah kyua mâo êbeh 4.200 ha ana pla mjing leh anăn ana ƀơ̆ng boh. Ti krĭng knông lăn anei mâo leh sang măi mkra mjing ktăk ksu, đang war rông mnơ̆ng mrâo mrang, anôk bruă pla mjing kdrăp mrâo mang… A Êl, khua mduôn ƀuôn Gia Xiêng brei thâo, să knông lăn Rơ Kơi ară anei amâo lŏ djŏ jing krĭng taih kbưi, krĭng dleh dlan ôh:

“Mkă hŏng êlâo dih mâo lu klei mlih, mơ̆ng anak mnuih, klei dôk dơ̆ng ƀơ̆ng huă truh kơ klei mđĭ kyar bruă duh mkra. Hlăm wưng giăm anei đĭ kyar pral. Ară anei mnuih ƀuôn sang bi pla kphê, ana hbei ƀlang, ksu. Mnuih ƀuôn sang ngă djŏ hdră mtrŭn mơ̆ng Đảng, klei bhiăn lăn čar mơ̆ng Knŭk Kna”.

Čar Kon Tum mâo 13 să bi knông hŏng 2 ala čar găp jing Lào leh anăn Campuchia. Hlăm klei mblah Mi, anei jing krĭng bi blah ktang phĭt mơ̆ng kahan Mi – Ngụy čiăng mkhư̆ lĭng kahan drei găn êlan Trường Sơn. 50 thŭn leh mtlaih êngiê, mbĭt hŏng êlan Hồ Chí Minh, êlan dơ̆ng 14C dưi duh bi liê ti knông lăn boh boh taih êbeh 292km.

Mơ̆ng krĭng lăn tŭ klei bi rai mơ̆ng boh ƀom, boh phao, drao ruă hlăm klei bi blah, Kon Tum dưi kpưn đĭ ktang. Thŭn dih, mnơ̆ng dhơ̆ng hlăm alŭ wăl mâo giăm 50.000 êklai prăk, hnư hrui wĭt kah knar grăp čô mâo 68 êklăk prăk, klei đĭ kyar 8,02%, dôk tal 24 hlăm lăn čar leh anăn kdlưn hĭn ti Lăn Dap Kngư. Nguyễn Tấn Liêm, khua knơ̆ng bruă lŏ hma leh anăn wăl hdĭp mda čar Kon Tum brei thâo, bruă lŏ hma mâo dŭm klei đru mguôp yuôm bhăn hŏng klei đĭ kyar bruă duh mkra mơ̆ng čar.

“Hlăm 4 thŭn hŏng anei, thŭn 2021 bruă lŏ hma hmei đĭ kyar jing 5,75% dôk tal 5 hlăm 63 čar, ƀuôn prŏng. Thŭn 2022 đĭ kyar 6,19% dôk tal 1. Thŭn 2023 đĭ 6,76% dôk tal 5 leh anăn thŭn 2024 đĭ 5,97% dôk tal 2. Hlăm 4 thŭn hŏng anei bruă lŏ hma hmei dôk hlăm top 5 kluôm ala”

Dôk kpưn đĭ ktang, čar Kon Tum ară anei mkŏ mjing leh 2 krĭng bruă duh mkra boh kdrŭt mâo ƀuôn prŏng Kon Tum leh anăn kdriêk Kôn Plông. Bi lar klei găl mâo, čar dưi mkŏ mjing krĭng pla ana êa drao ti 3 kdriêk Tu Mơ Rông, Đăk Glei, Kon Plông hŏng ênhă êbeh 13.000ha, hlăm anăn mâo êbeh 2.900 ha Sâm Ngọc Linh. Wăl anôk hiu čhưn ênguê Măng Đen ti kdriêk Kon Plông jing anôk truh iêo jak phung tuê hiu čhưn ênguê hlăm leh anăn êngao lăn čar…

Ti anăp klei čuăn hƀuê ênuk hlăm ênuk kpưn đĭ mơ̆ng djuê ana, ngă klei gĭt gai mơ̆ng gưl dlông, čar Kon Tum ngă leh bruă mkŏ dăp hŏng hdră khuăt, kjăp ktang, tŭ dưn. Dương Văn Trang, khua hlăm bruă Đảng gưl dlông, khua bruă Đảng čar, khua Êpul gơ̆ng bruă ƀuôn sang čar Kon Tum brei thâo, bruă kđi čar dôk gĭr bi leh mta kñăm đĭ kyar 10% thŭn 2025, kdlưn hĭn ti Lăn Dap Kngư.

“Hlăm wưng kơ anăp ăt srăng mâo lu bruă klam yuôm bhăn čiăng kơ bruă kđi čar ngă bruă hŏng ai tiê mjêč, djŏ hdră bhiăn leh anăn mâo bruă đua klam. Grăp čô hlăm gưl bruă Đảng nah gŭ, phung khua gĭt gai dŭm anôk bruă lŏ dơ̆ng bi lar bruă klam nao êlâo, bi mguôp, sa ai găn jih klei dleh dlan, klei lông dlăng bi leh jăk bruă klam dưi jao năng hŏng klei đăo knang mơ̆ng bruă Đảng leh anăn mnuih ƀuôn sang hlăm čar”.

50 thŭn leh mtlaih êngiê, mơ̆ng krĭng lăn tŭ lu klei jŭ jhat mơ̆ng klei bi blah, Kon Tum dôk kpưn đĭ jing gru mngač ti Lăn Dap Kngư. Mŭt hlăm wưng mrâo, hŏng klei gĭr ktang phĭt, Kon Tum dôk bi klă kơhưm, mđing truh kơ mta kñăm đĭ kyar pral, hơĭt kjăp, năng jing krĭng lăn jhŏng ktang.