VOV4.Êđê- Kñăm mkŏ, đru kơ dŭm anôk bruă mkra jing, mnia mblei mnơ̆ng dhơ̆ng krĭng čư̆ čiăng, krĭng taih kbưi leh anăn plao ksĭ, aguah mbruê 5/10, ti Hà Nội, phŭn bruă tuh tia mkŏ mjing klei kƀĭn bruă duh mkra mkŏ bruă mkra mjing, ba čhĭ mnơ̆ng dhơ̆ng mnia mblei krĭng čư̆ čhiăng, krĭng taih kbưi leh anăn plao ksĭ thŭn 2022. Hluê ngă hdră mđĭ kyar mnơ̆ng dhơ̆ng mnia mblei krĭng čư̆ čiăng, krĭng taih kbưi leh anăn plao ksĭ wưng thŭn 2015-2020 dưi ba wĭt lu boh tŭ jăk kơ klei đĭ kyar bruă čhĭ hliê mnơ̆ng dhơ̆ng hlăm lu thŭn êgao ti dŭm alŭ wăl dleh dlan. Wưng kơ anăp, Phŭn bruă tuh tia srăng gĭt gai, bi mguôp hŏng dŭm phŭn, dhar bruă, anôk bruă djŏ tuôm leh anăn dŭm alŭ wăl krĭng čư̆ čhiăng, krĭng taih kbưi leh anăn plao ksĭ hluê ngă 6 bruă klam kñăm, hlăm anăn mâo bruă bi leh hdră bhiăn kñăm mtrŭt mđĭ klei mkra mjing, dŭ mdiăng mnơ̆ng dhơ̆ng mâo klei găl mơ̆ng krĭng čư̆ čiăng, krĭng taih kbưi leh anăn plao ksĭ. Ksiêm duah mđĭ kyar kjăp, mđĭ ênoh mnơ̆ng dhơ̆ng dưi mkra mjing ti alŭ krĭng čư̆ čiăng, krĭng taih kbưi leh anăn plao ksĭ, bi mguôp hŏng dŭm alŭ wăl leh anăn phung mkăp brei mkŏ mjing dŭm hdră mkăp brei mnơ̆ng dhơ̆ng đru kơ bruă mkra mjing leh anăn blei ba yua ti krĭng čư̆ čiăng, krĭng taih kbưi leh anăn plao ksĭ.

Pô mblang: Y-Ƀel Êban